Lista Serbe: Kurti ka qëllim rritjen e tensioneve

Lajme

Gazeta Express

18/09/2023 14:24

Partia kryesore e serbëve në Kosovë, Lista Serbe, ka reaguar pas adresimit të kryeministrit Albin Kurti lidhur me takimin e 14 shtatorit në Bruksel, duke thënë se Kurti po mban qëndrim anti-serb e po vepron kundër popullit serb në Kosovë.

Në deklaratën e lëshuar në rrjete sociale nga kjo parti, thuhet se vendimi i kësaj partie dhe i të gjithë qytetarëve për t’u larguar nga institucionet e Kosovës në veri të vendit është marrë në mënyrë të pavarur.

Lista Serbe ka thënë se Kurti nuk dëshiron që ta shtensionojë situatën, por t’i rrisë tensionet dhe ta kërcënojë paqen e brishtë.

“Një mori të pavërteta të thëna në Prishtinë nga Albin Kurti nuk mund ta fshehin karakterin anti-serb të regjimit të tij. Të gjitha gënjeshtrat e Albin Kurtit nuk mund ta errësojnë të vërtetën për të cilën janë të vetëdijshëm të gjithë qytetarët tanë që vuajnë çdo ditë shtypjen e tij, dhe për atë që janë gjithnjë e më të vetëdijshëm nga përfaqësuesit e bashkësisë ndërkombëtare, anëtarët e të cilit në terren vërejnë çdo ditë se Kurti po e flet një gjë dhe po e bën një tjetër. Ai flet për demokraci dhe shtet ligjor dhe zbaton autokracinë dhe nëpërkëmbjen e të gjitha akteve ligjore”, thuhet në deklaratën e Listës Serbe.