“Ku ishte ti” Para se t’i qëllonte policëve, Lefter Zhidru tentoi fillimisht të vrasë gruan

Gazeta Express

24/09/2020 16:13

71 vjeçari Lefter Zhidru armën e mori në banesë me qëllim për të vrarë të shoqen. Të tjera detaje kanë dalë në dritë në lidhje me ngjarjen e rëndë të ndodhur në Elbasan, ku 71 vjeçari ende po i bën rezistencë forcave speciale RENEA dhe nuk pranon të dorëzohet.

Gjithçka ka nisur nga një sherr i çastit mes të moshuarit dhe ish gruas së tij. Ngjarja e treguar sipas fqinjëve ka nisur kur i moshuari i ka kërkuar llogari ish gruas se ku kishte shkuar. Gjatë debatit i moshuari ka shkuar të marrë armën e zjarrit për të vrarë ish gruan. Kjo e fundit e ka kuptuar situatën dhe së bashku me të bijën 14 vjeçare, është larguar menjëherë nga banesa dhe ka njoftuar policinë.

Me të mbërritur atje, ndaj oficerëve të policisë është hapur zjarr nga ana e të moshuarit, i cili ende nuk i është dorëzuar forcave të rendit dhe vijon të qëndrojë i ngujuar në banesën e tij në lagjen ’11 nëntori’.