Prokuroria Themelore e Ferizajt ka kërkuar caktimin e masës së paraburgimit prej 30 ditësh për një ish-zyrtar të gjendjes civile në këtë komunë, me inicialet B.Xh, nën dyshimin për “Keqpërdorim të pozitës apo autoritetit zyrtar”.
Sipas Prokurorisë, ai dyshohet se ka keqpërdorur detyrat e tij zyrtare me qëllim të përfitimit për personin tjetër, në atë mënyrë që në kundërshtim Ligjin për Gjendjen Civile, një shtetas turk me inicialet M.K, e ka regjistruar në sistemin elektronik të Gjendjes Civile në Komunë e Ferizajt, duke i mundësuar që të pajiset me letërnjoftim të Republikës së Kosovës dhe patentë shofer, raporton Express.
“I pandehuri, me vendim të Prokurorit të Shtetit, që nga data 23 Prill 2024, gjendet nën masën e ndalimit 48 orësh për veprën penale të lartëcekur”, thuhet në njoftim.