KDI kundërshton shqyrtimin me urgjencë të projektligjit për Byronë, shkelje e rregullores

Lajme

Gazeta Express

21/04/2026 18:40

Instituti Demokratik i Kosovës (KDI) kundërshton mënyrën e shqyrtimit të Projektligjit për Byronë Shtetërore për Verifikimin dhe Konfiskimin e Pasurisë së Pajustifikueshme, duke vlerësuar se janë shkelur procedurat parlamentare dhe janë kufizuar mundësitë për përfshirje të palëve të interesuara në proces.

Menaxheri i programit në Institutin Demokratik të Kosovës (KDI), Eugen Cakolli, në konferencë për media, vlerësoi se organizimi i dëgjimit me urgjencë, është jashtë rregullave të përcaktuara për dëgjime publike legjislative dhe kështu e kufizon mundësinë për pjesëmarrje qytetare, organizatave joqeveritare dhe të gjitha palëve për të dhënë kontribut.

“Në mbledhjen e parë të Komisionit për Legjislacion, i mbajtur sot në ora 9:00 në mëngjes, është diskutuar për organizimin e dëgjimit publik si pjesë të shqyrtimit përmbajtësor të këtij projektligji. Derisa pak orë pas përfundimit të kësaj mbledhjeje, është thirrur një mbledhje tjetër, në të cilën është marrë, në fakt, vendim me votat e deputetëve të shumicës parlamentare që dëgjimi publik të mbahet qysh ditën e nesërme, pra më pak se 24 orë nga momenti në fjalë. Ky zhvillim pa dyshim që e shkurton në mënyrë të ndjeshme kohën e vendimmarrjes, përgatitjes dhe zhvillimit të dëgjimit publik, duke e krijuar një pikë kthese në tërë procesin, pasi që një afat i tillë nuk lë hapësirë reale për përgatitje dhe kufizon praktikisht mundësinë e palëve të interesuara që të japin kontribute në këtë projektligj”, tha ai.

Ai tha se në të njëjtën kohë gjatë diskutimeve në Komision është reflektuar edhe një qasje kufizuese, e cila ka anashkaluar asistencën e ofruar nga KDI-ja për organizimin e dëgjimit publik, që jo vetëm e cenon bashkëpunimin, por edhe përcjell një mesazh negativ sa i përket përfshirjes së shoqërisë civile në procese vendimmarrëse.

“KDI rikujton që meqenëse Kuvendi nuk e ka mbështetur iniciativën për shmangie të afateve procedurale në shqyrtimin e këtij projektligji, pikërisht për shkak të historikut problematik të tij për shkak të zvarritjeve, konsiderojmë që asnjë rrethanë e tanishme, sado urgjente, nuk e arsyeton shkeljen e procedurave parlamentare dhe të afateve të përcaktuara në Rregulloren e Punës së Kuvendit”, tha ai.

Në fund të konferencës për media ai në emër të KDI-së ftoi Kuvendin që të respektojë standardet e përcaktuara në Rregullore dhe të sigurojë që procesi i shqyrtimit të këtij projektligji dhe i zhvillimit të dëgjimit publik legjislativ të jetë i barabartë, gjithëpërfshirës dhe që si i tillë të garantojë mundësi reale për kontribut nga të gjitha palët e interesit./KP