Jurgen Klopp tregon se si Liverpooli ishte afër të nënshkruante me Kylian Mbappen

Futboll

Gazeta Express

10/07/2026 17:39

Jurgen Klopp ka zbuluar detaje interesante nga përpjekja e Liverpoolit për të transferuar Kylian Mbappen, duke treguar se ai kishte udhëtuar me familjen e sulmuesit francez në një avion privat në përpjekje për ta bindur të transferohej në “Anfield”.

Interesimi i Liverpoolit për Mbappen daton që nga vera e vitit 2017, pasi sulmuesi kishte realizuar 26 gola dhe tetë asistime, duke ndihmuar Monacon të shpallej kampione e Francës.

Në atë kohë, Mbappe kërkohej nga shumë klube të mëdha evropiane, përfshirë Real Madridin dhe Arsenalin, por në fund ishte Paris Saint-Germain që fitoi garën për nënshkrimin e tij në një marrëveshje me vlerë rreth 166 milionë funte.

Megjithatë, ajo që pak njerëz dinë është se Liverpooli bëri gjithçka për ta bindur francezin para se ai të zgjidhte PSG-në.

Duke folur për “MagentaTV” përpara çerekfinales së Francës ndaj Marokut, ish-trajneri i Liverpoolit kujtoi takimin e veçantë me Mbappen dhe familjen e tij.

“Ishte mos-transferimi më i shtrenjtë ku ne, si Liverpool, investuam,” tha Klopp.

“Fluturuam nga Blackpool në Nice. Atje, e gjithë familja e Mbappes hipi në një avion privat me pesë dhoma apo diçka të tillë. Vërtet bëmë gjithçka. Pastaj fluturuam nëpër qiell duke bërë xhiro, biseduam me familjen, hëngrëm ushqim të mirë. Nuk na lejohej të na shihte askush. Vetëm fluturonim në rreth. Ishte fantastike. Më pas ai shkoi në Paris”, shtoi ai.

Edhe vetë Mbappe kishte konfirmuar interesimin e Liverpoolit në një intervistë për “Daily Telegraph” në vitin 2022, duke zbuluar se klubi anglez ka një vend të veçantë në familjen e tij.

“Folëm pak, por jo shumë. Patëm disa biseda. Kam folur me Liverpoolin sepse është klubi i preferuar i nënës sime. Nëna ime e adhuron Liverpoolin. Nuk e di pse, duhet ta pyesni atë. Është një klub i madh dhe u takuam me ta pesë vite më parë, kur isha te Monaco”, tha Mbappe.

Gazetarja Melissa Reddy dha gjithashtu më shumë detaje mbi këtë histori pas deklaratave të Kloppit.

“Në shkurt të vitit 2016, kur Kylian Mbappe ende nuk kishte nënshkruar kontratë profesionale me Monacon, unë raportova për interesimin e Liverpoolit ndaj tij. Në atë kohë, klubi e kishte ndjekur për 16 muaj. Edhe atëherë më ishte thënë se do të ishte praktikisht e pamundur ta transferonin, sepse ai do të bëhej lojtari më i mirë në botë. PSG dhe Real Madridi ofronin kushte financiare që Liverpool nuk mund t’i konkurronte. Megjithatë, Liverpooli donte të provonte. Takimi për të cilin flet Klopp ndodhi në vitin 2017 dhe ishte nëna e Mbappes ajo që dëshironte shumë që ai të zhvillohej”, tha ajo.

Sipas një raporti të “L’Equipe”, Mbappe ishte pranë kalimit te Liverpooli edhe në vitin 2022, kur po shqyrtonte largimin nga Paris Saint-Germain.

Madje thuhet se ai kishte arritur një marrëveshje verbale me klubin anglez pasi Liverpooli kishte bërë një ofertë prej 200 milionë eurosh (169 milionë funtesh). Megjithatë, sulmuesi francez përfundimisht iu bashkua Real Madridit në vitin 2024./GazetaExpress/