Juliana Nura në pritje të binjakëve, pas premierës së “Eagle Queen” nisin xhirimet e episodit të dytë

Yjet

Gazeta Express

06/07/2026 14:59

Juliana Nura ka qenë sërish në qendër të vëmendjes, këtë herë me pamjet e veçanta nga “Baby Shower”-i i saj, të organizuar në një ambient të hapur dhe të dekoruar me shumë kujdes.

Në fotografitë dhe videot e publikuara në rrjetet sociale, Juli shfaqet elegante me një fustan të bardhë, ndërsa atmosfera e festës ka konfirmuar zyrtarisht lajmin që prej kohësh ishte përfolur: ajo është në pritje të binjakëve.

Një nga detajet që mori më së shumti vëmendje ishte kartolina me mbishkrimin “Hello Little Twins!”, e cila zbuloi qartë se modelja dhe personazhi i njohur televiziv po përgatitet për një kapitull krejtësisht të ri në jetën e saj.

Ky moment vjen në një periudhë mjaft të rëndësishme për Julianën, e cila së fundmi ka qenë në fokus edhe për premierën e reality show-t të saj, “Eagle Queen”. Projekti, i cili sjell për publikun një pamje më të afërt të jetës së saj, ka nisur rrugëtimin me shumë interesim, duke premtuar emocione, rrëfime personale dhe momente të papritura.

Ndërkohë, burime pranë produksionit bëjnë të ditur se xhirimet e episodit të dytë tashmë kanë filluar, duke paralajmëruar se publiku do të ketë mundësi të ndjekë nga afër zhvillimet më të fundit në jetën e Julianës, përfshirë edhe këtë periudhë të veçantë të shtatzënisë.

Javët e fundit, emri i Juliana Nurës është komentuar gjerësisht pasi ajo vendosi të flasë hapur për vendimin e saj për t’u bërë nënë e vetme përmes procedurës IVF me një donator shqiptar. Rrëfimi i saj ka ngjallur reagime të shumta, por edhe mbështetje nga ndjekësit që e kanë vlerësuar për guximin dhe sinqeritetin.

Më herët, në media qarkulluan edhe pamje nga festa e zbulimit të gjinisë, ku u la të kuptohej se Juli është në pritje të një djali dhe një vajze. Megjithatë, ajo vetë ka zgjedhur të mos japë ende një konfirmim të drejtpërdrejtë për gjininë e binjakëve.

Me “Baby Shower”-in, premierën e “Eagle Queen” dhe nisjen e xhirimeve të episodit të dytë, Juliana Nura po e kthen këtë fazë të jetës në një rrëfim publik plot emocione, kuriozitet dhe vëmendje mediatike. /GazetaExpress/