Ismaili: Ne po bëjmë betejë në dy anë, duke mbrojtur të kaluarën dhe duke hapur rrugë përpara

Lajme

Gazeta Express

25/05/2026 20:39

Nënkryetari i Partisë Demokratike të Kosovës, Uran Ismaili, ka thënë se PDK-ja po përpiqet të ndërtojë një model politik që ruan lidhjen me historinë e saj, por në të njëjtën kohë i përgjigjet nevojës për ndryshim dhe përfaqësim të ri.

I ftuar në podcastin e Grida Dumës, Ismaili tha se largimi i figurave historike të PDK-së në Hagë nuk është parë nga partia si mundësi për shkëputje nga e kaluara, por si obligim për ta mbajtur gjallë atë trashëgimi dhe për ta çuar përpara në një formë të re.

“Ne nuk kemi dashur të shkëputemi nga e kaluara jonë, e cila është e lavdishme, por edhe e lidhur me shtetin”, tha Ismaili.

Ai theksoi se PDK-ja po i përshtatet ndryshimeve të kohës, sidomos mënyrës se si qytetarët dhe të rinjtë e ndjekin politikën sot, por pa hequr dorë nga vlerat mbi të cilat është ndërtuar partia.

“Në këtë drejtim jemi duke bërë betejë në të dy anët, edhe duke mbrojtur të kaluarën”, u shpreh Ismaili.

Sipas tij, prania e shumë kandidatëve të rinj në listën e PDK-së tregon se partia po hap rrugë për gjenerata të reja, por duke e parë historinë e saj si inspirim dhe jo si pengesë.

LINK: