Ibrahima Konate arrin marrëveshje me klubin e ri, pas largimit nga Liverpooli

Futboll

Gazeta Express

01/06/2026 17:20

Ibrahima Konate raportohet se ka arritur marrëveshje për t’iu bashkuar një klubi të madh evropian, vetëm pak ditë pasi u konfirmua largimi i tij nga Liverpooli.

Pas pesë vitesh si lojtar i Liverpoolit, reprezentuesi francez Konate është larguar zyrtarisht nga klubi pas skadimit të kontratës së tij.

Mbrojtësi qendror u transferua nga Leipzigu për 36 milionë paund në verën e vitit 2021 dhe zhvilloi 183 paraqitje në të gjitha garat për Liverpoolin, duke luajtur një rol të rëndësishëm në fitimin e titullit të 20-të të Premierligës nga klubi në sezonin 2024/25.

Gjatë sezonit 2025/26 u raportua gjerësisht se Konate dhe Liverpooli po negocionin për një kontratë të re që do ta mbante francezin në “Anfield”, por bisedimet përfundimisht dështuan.

“Jam thellësisht i trishtuar që nuk pata mundësinë t’ju përshëndes të gjithëve në ndeshjen e fundit. Në atë moment nuk e dija se do të ishte hera ime e fundit duke veshur këtë fanellë para jush”, shkroi Konate në “Instagram” pasi u konfirmua largimi i tij.

Që nga ajo kohë, shumë tifozë kanë pyetur se ku do ta vazhdojë karrierën mbrojtësi francez, me disa klube të mëdha që thuhet se janë të interesuara për ta transferuar pas Kupës së Botës këtë verë.

Megjithatë, tani raportohet se 27-vjeçari mund ta ketë finalizuar tashmë marrëveshjen me Real Madridin.

Sipas mediumit spanjoll “Radioestadio Noche”, presidenti Florentino Perezi ka arritur marrëveshje për transferimin e mbrojtësit francez.

Perezi aktualisht po kalon nëpër një proces të ri zgjedhor presidencial te klubi madrilen dhe raporti pretendon se përparimi në negociatat me Konaten po përdoret si pjesë e fushatës së tij për rizgjedhje.

Interesimi i Real Madridit vjen në një kohë kur klubi po kërkon të forcojë repartin e mbrojtjes, një nga prioritetet kryesore të merkatos verore.

Mundësia për të nënshkruar me një nga mbrojtësit më të mirë të Premierligës si lojtar i lirë konsiderohet një rast ideal për gjigantët spanjollë, ashtu siç tentuan të bënin me Trent Alexander-Arnoldin verën e kaluar.

Për këtë arsye, Real Madridi e ka monitoruar situatën e Konates prej kohësh dhe madje ishte lidhur me një lëvizje për të më herët gjatë sezonit 2025/26, përpara se të tërhiqej për shkak të formës jo bindëse të lojtarit në fillim të sezonit.

Largimi i Konates ngre natyrshëm pikëpyetje te tifozët e Liverpoolit për zëvendësuesin e mundshëm të tij.

Pas shkarkimit surprizë të Arne Slotit, ende nuk është e qartë se cili do të jetë plani i Liverpoolit në afatin kalimtar, por një emër që po përmendet për rikthim është ai i Jarell Quansahit.

Sipas raportimeve, Liverpooli ka zhvilluar bisedime për ta rikthyer produktin e akademisë së klubit, i cili u largua verën e kaluar për t’iu bashkuar Bayer Leverkusenit për 35 milionë paund.

23-vjeçari pati pak minuta dhe vështirësi për të siguruar një vend të rregullt në formacion gjatë sezonit të parë të Arne Slotit, duke çuar në largimin e tij.

Megjithatë, raportohet se marrëveshja përfshinte një klauzolë rikthimi prej rreth 70 milionë paund këtë verë, ndërsa shuma do të binte në afërsisht 50 milionë paund nga vera e vitit 2027.

Ndërkohë, Liverpooli besohet se po planifikon t’u japë më shumë përgjegjësi sezonin e ardhshëm edhe mbrojtësve të rinj Jeremy Jacquet dhe Giovanni Leoni./GazetaExpress/