Hoti: Aleatët do të na përkrahnin për reciprocitetin, Kurtin s’e lanë konspiracionet të gjykojë arsyeshëm

Gazeta Express

01/04/2020 19:15

Ish-zëvendëskryeministri i parë i Qeverisë në detyrë, Avdullah Hoti, përmes një shkrimi ka thënë se aleatët e Kosovës do ta përkrahnin reciprocitetin, por kryeministrin në detyrë i Kosovës, Albin Kurtin, nuk e lanë konspiracionet të gjykojë arsyeshëm.

Hoti thotë se kryeministri në detyrë i Kosovës, Albin Kurti, ka hyrë në një rrugë pa krye e cila nuk ka të ndalur.

“Rruga pa krye e z.Kurti nuk ka të ndalur. Aleatët tanë na kanë kërkuar tërë kohën që të besojmë në ta dhe në planin e tyre, duke hequr taksën pa kushte, në mënyrë që ta detyronin Serbinë të ndalonte fushatën kundër Kosovës, dhe atë në mënyrë të verifikueshme”, shkruan Hoti.

Gjithashtu, Hoti tha se aleatët e Kosovës do ta përkrahnin reciprocitetin në mes të Kosovës dhe Serbisë, por Kurti u fut në konspiracione dhe nuk gjykoi arsyeshëm.

“Aleatët tanë kërkonin kohë që të detyronin Serbinë të hiqte pengesat për lëvizje të lirë të qytetarëve dhe mallrave me Kosovën. Nëse këto pengesa nuk do të hiqeshin, atëherë aleatët do të mbështesnin Kosovën në vendosjen e masave të reciprocitetit.

Qasja konspirative nuk e la z. Kurti të gjykojë arsyeshëm në këto kërkesa të aleatëve tanë, duke dëmtuar kështu partneritetin tonë me ta, që detyrimisht qoi në shkarkimin e tij”, shkroi Hoti.

Tutje, ai thotë se aktualisht Kosova e ka humbur shansin që heqja e taksës të përkthehet në mbështetje të Kosovës dhe presion ndaj Serbisë nga aleatët e Kosovës.

“Tani, me këto veprime të njëanshme të Qeverisë së shkarkuar, Kosova e ka humbur shansin që heqjen e taksës ta përkthejë në mbështetje për Kosovën dhe presion mbi Serbinë nga aleatët tanë”, shkruan Hoti.

Krejt në fund, Hoti thotë një qeveri e re që është besimplotë karshi aleatëve të Kosovës, është tepër e nevojshme.

“Është tepër e nevojshme që sa më parë të kemi Qeveri të re të zgjedhur mbi parimet kushtetuese, që është e përgjegjshme karshi proceseve shtet-ndërtuese dhe besimplote karshi aleatëve tanë”, përfundoi Hoti.

Kujtojmë se qeveria në detyrë e Kosovës thotë se ka vendosur masa të reciprocitetit ndaj produkteve që vijnë nga Serbia.

Megjithatë, pas këtij veprimi të qeverisë në detyrë kanë ardhur reagime të ndryshme nga politikanë të subjekteve të ndryshme.