Gruaja e Navalny flet në Mynih: Nëse është e vërtetë që Alexey ka vdekur, Putini ta dijë se do të mbajë përgjegjësi

Lajme

Gazeta Express

16/02/2024 15:45

Gruaja e Alexei Navalny, Julia, sapo ka folur në Konferencën e Sigurisë në Mynih që është duke u mbajtur pas raportimit se burri i saj vdiq në burg.

Ajo foli me emocione për vendimin që duhet të marrë nëse do të qëndrojë në Mynih dhe të flasë në skenë apo të kthehet menjëherë te fëmijët e saj. Ajo vendosi të bënte atë që do të kishte bërë i shoqi – vendosi të fliste në konferencë, raporton The Guardian, transmeton Gazeta Express.

Ajo tha se nuk e dinte nëse duhet t’i besohet lajmit të tmerrshëm, por tha se Vladimir Putin është “personalisht përgjegjës për të gjitha gjërat e tmerrshme që po i bëjnë vendit tim”.

Ajo tha se lajmi kishte ardhur vetëm nga burime të qeverisë ruse, duke shtuar: “për shumë vite nuk mund t’i besojmë Putinit dhe qeverisë së Putinit. Ata gjithmonë gënjejnë”.

Por ajo tha: “Nëse kjo është e vërtetë, dua që Putini dhe të gjithë rreth i tij të dinë se do të mbajnë përgjegjësi për gjithçka që i kanë bërë vendit tonë, familjes sime. Dhe kjo ditë do të ndodhë shumë shpejt”.

Ajo i bëri thirrje komunitetit ndërkombëtar që të bashkohet dhe të ndëshkojë “këtë regjim të tmerrshëm” në Rusi.