Gjukanoviq në Vjenë, akuzon Serbinë dhe RS-në se janë “proksit e Rusisë” në Ballkan

Lajme

Gazeta Express

09/12/2022 13:45

Presidenti i Malit të Zi, Milo Gjukanoviq, akuzoi Serbinë dhe Republikën Srpska si “proksit e Rusisë” në Ballkan.

Duke folur në një panel të organizuar nga socialistët evropianë në Vjenë, ai tha se në vitin 2016, Rusia u përpoq të bënte një grusht shteti në Mal të Zi për të parandaluar anëtarësimin e saj në NATO.

Edhe pse dështoi në këtë, Gjukanoviq thotë se pritej që Rusia të mos pajtohej lehtë me “shuplakën që mori nga një Mal i Zi i vogël”.

“Dhe nuk u pajtua. Ajo ka bërë luftën e saj hibride gjatë gjithë këtyre viteve”, tha Gjukanoviq, duke shtuar se atëherë u shfaqën “bashkëpunëtorët rusë nga rajoni”.

Mos harroni se për katër vjet Rusia ka instaluar dy nga bazat e saj për të zhvilluar një luftë hibride në rajon, në Serbi dhe Republika Srpska. Vetëm një i verbër nuk dëshiron ta shohë këtë”, tha Gjukanoviq.

Ai shtoi se Rusia ka zhvilluar ndikimin e saj në shumë fusha, se ka zhvilluar struktura mediatike, inteligjente dhe sigurie, por edhe struktura ekonomike dhe energjetike dhe se abuzon me kishën ortodokse në rajon.

“Nuk është çudi që vendet e vogla si Mali i Zi nuk kanë arritur plotësisht t’i rezistojnë një agresioni të tillë”, tha Gjukanoviq./N1