Gasperini vendosë kushte për të qëndruar te Roma, pas përplasjes me Ranierin

Futboll

Gazeta Express

20/04/2026 18:23

Raportimet në Itali tregojnë se Gian Piero Gasperini është i gatshëm të qëndrojë si trajner i Romës pavarësisht një jave të vështirë dhe një përplasjeje publike me këshilltarin e lartë Claudio Ranieri, por ai ka vendosur katër kushte kyçe për të vazhduar në “Stadio Olimpico” për sezonin 2026/27.

Ka pasur shumë spekulime mbi të ardhmen e Gasperinit në krye të Romës kohët e fundit, edhe pse ish-trajneri i Atalantës u emërua më pak se një vit më parë.

Aktualisht, Roma ndodhet në vendin e gjashtë në tabelën e Serie A dhe ka shumë pak gjasa të kualifikohet për Ligën e Kampionëve sezonin e ardhshëm, pasi Juventusi është shkëputur me pesë pikë në vendin e katërt.

Gasperini ka pasur gjithashtu një përplasje publike me Ranierin, i cili deklaroi se trajneri nuk ishte as në tre kandidatët kryesorë të klubit për këtë rol në fund të sezonit të kaluar.

Disa raportime pretendojnë se Gasperini dhe Ranieri po e injoronin njëri-tjetrin në qendrën stërvitore në fillim të javës së kaluar, ndërsa disa media italiane thonë se situata tashmë është bërë e paqëndrueshme.

Sipas raportimeve të së hënës nga “La Gazzetta dello Sport”, largimi i Ranierit nga struktura e klubit është një nga kushtet kryesore të Gasperinit për të qëndruar si trajner i Romës sezonin e ardhshëm.

Për më tepër, Gasperini nuk është shumë i prirur të vazhdojë bashkëpunimin me drejtorin sportiv Ricky Massara.

Sipas raportit, marrëdhënia mes tyre nuk ka funksionuar kurrë siç duhet dhe ata vazhdojnë të kenë mospajtime për vendimet në merkato.

Gasperini gjithashtu kërkon më shumë “kontroll” mbi klubin në tërësi.

Ai preferon një rol të stilit të vjetër të “menaxherit anglez”, me më shumë ndikim në transferime dhe vendime të tjera brenda klubit, si për shembull emërimi i stafit mjekësor – një çështje që ai e ka ngritur shpesh gjatë sezonit 2025/26.

Së fundi, Gasperini kërkon garanci për merkaton dhe siguri se do të ketë një buxhet të konsiderueshëm për të investuar në lojtarë të rinj, pas dy dritareve të transferimeve që ai i konsideron zhgënjyese./GazetaExpress/