Freiburg kërkon historinë ndaj Aston Villas – formacionet zyrtare për finalen e Europa Ligë

Futboll

Gazeta Express

20/05/2026 19:47

Freiburgu synon trofeun e parë të madh në historinë e klubit, por në finalen e UEFA Europa League në Stamboll vjen si autsajder përballë Aston Villas, një skuadër në formë të shkëlqyer dhe e drejtuar nga Unai Emery, trajner që e ka fituar katër herë këtë kompeticion.

Freiburgu mbërrin në Turqi me moral të lartë, pasi ka shënuar nëntë gola në tri ndeshjet e fundit. Dy fitoret e kësaj serie erdhën ndaj Bragës, 3-1, rezultat që i siguroi vendin në finale, dhe ndaj Leipzigut, 4-1, fitore që i garantoi pjesëmarrjen në garat evropiane edhe sezonin e ardhshëm, pavarësisht rezultatit në këtë finale.

Trajneri Julian Schuster do të bëhet trajneri më i ri gjerman që udhëheq një skuadër në një finale evropiane në 24 vitet e fundit. Megjithatë, mungesa e përvojës nuk lidhet vetëm me të. Kjo është vetëm finalja e dytë madhore në historinë e Freiburgut, pas humbjes në finalen e Kupës së Gjermanisë në sezonin 2021-22.

Freiburgu është gjithashtu skuadra e parë gjermane debutuese në një finale evropiane gjatë këtij shekulli. Nëse fiton në Stamboll, klubi do të sigurojë për herë të parë në histori edhe kualifikimin në Ligën e Kampionëve.

Aston Villa, kampione e Evropës në vitin 1982, është rikthyer në skenën e madhe dhe vjen në këtë finale në formë shumë të mirë. Skuadra angleze shënoi katër gola në fitoren ndaj Nottingham Forestit në gjysmëfinalen e Europa League, 4-0, përpara se të mposhtte bindshëm Liverpoolin të premten, 4-2.

Rikthimi i Villas si një forcë evropiane është mbresëlënës. Që nga fillimi i sezonit 2023-24, asnjë skuadër nuk ka fituar më shumë ndeshje në kompeticionet madhore të UEFA-s sesa “Villans”, me 26 fitore. Vendi në Ligën e Kampionëve për sezonin e ardhshëm tashmë është i sigurt, pavarësisht rezultatit në këtë finale.

Vetë prania e Unai Emeryt në stol i jep Villas shumë besim. Kjo do të jetë finalja e gjashtë madhore evropiane për trajnerin spanjoll, i cili ka fituar katër dhe ka humbur një. Emery gjithashtu bëhet vetëm trajneri i dytë që udhëheq katër klube të ndryshme në finale evropiane.

Historia e përballjeve direkte

Freiburgu dhe Aston Villa nuk janë përballur kurrë më parë. Klubi gjerman ka fituar vetëm një nga katër ndeshjet e mëparshme ndaj skuadrave angleze, ndërsa ka humbur tri.

Nga ana tjetër, Aston Villa mposhti dy skuadra gjermane sezonin e kaluar dhe humbjen e fundit ndaj një kundërshtari nga Gjermania e ka pësuar në sezonin 2008-09. Skuadrat angleze kanë fituar tetë nga dhjetë finalet e mëparshme madhore evropiane kundër klubeve gjermane.

Statistika dhe seri interesante

Në tetë nga nëntë ndeshjet e fundit të Freiburgut kanë shënuar të dyja skuadrat.

Freiburgu ka shënuar në të dyja pjesët në secilën nga tri ndeshjet e fundit.

Aston Villa ka shënuar tetë gola nga minuta e 76-të deri në fund të kohës së rregullt këtë sezon në Europa League, më shumë se çdo skuadër tjetër.

Shtatë nga dhjetë ndeshjet e fundit zyrtare të Villas kanë prodhuar mbi 2.5 gola.

Lojtarët kryesorë dhe mungesat

Askush nuk ka më shumë përfshirje në gola në Europa League këtë sezon sesa Vincenzo Grifo i Freiburgut, me pesë gola dhe katër asistime. Ai ka kontribuar me të paktën një gol ose asistim në secilën nga pesë paraqitjet e fundit në këtë kompeticion.

Te Aston Villa, Ollie Watkins ka gjetur formën në momentin ideal, me gjashtë kontribute direkte në gola në tri ndeshjet e fundit, katër gola dhe dy asistime. Të pesë golat e tij në Europa League këtë sezon kanë ardhur në fazën me eliminim direkt, ndërsa tri prej tyre kanë qenë gola hapës.

Freiburgu nuk pritet të ketë mungesa të reja, ndërsa te Aston Villa, Amadou Onana synon të rikthehet nga dëmtimi. /GazetaExpress/

Formacionet zyrtare:

SC Frieburg

Aston Villa

Ndeshja fillon në orën 21:00 në stadiumin Besiktash Park në Stamboll të Turqisë