Festimi viral i Norvegjisë pushton Botërorin

Futboll

Gazeta Express

23/06/2026 13:19

Norvegjia jo vetëm që siguroi kualifikimin në fazën e 1/32-ës së finales së Kupës së Botës, por krijoi edhe një nga momentet më të paharrueshme të turneut falë festimit të saj viral pas fitores 3-2 ndaj Senegalit.

Dy gola të Erling Haaland dhe një realizim i Marcus Holmgren Pedersen i dhanë norvegjezëve një fitore historike, ndërsa pas ndeshjes vëmendjen e mori festa e pazakontë e skuadrës.

Menjëherë pas vërshëllimës së fundit, të gjithë anëtarët e ekipit, përfshirë trajnerin Ståle Solbakken, u ulën në fushë dhe imituan lëvizjet e një barke vikinge që lundronte.

Kapiteni Martin Ødegaard mbante një çekan simbolik dhe goditi “daullen” dy herë, ndërsa lojtarët dhe tifozët nisën të “lundronin” në sinkron me ritmin. Festimi, i quajtur “Viking Row” (Lundrimi Viking), është bërë viral në rrjetet sociale gjatë këtij Botërori.

Haaland: “Nëse fitonim, pse jo?”

Pas ndeshjes, Haaland zbuloi se ideja lindi nga popullariteti i madh që festimi kishte fituar në internet.

“E pashë online dhe ishte bërë krejtësisht viral. Martin më pyeti para ndeshjes nëse duhej ta bënim dhe unë i thashë: ‘Nëse fitojmë, pse jo?’”, tha sulmuesi norvegjez.

The Norwegian team and fans doing the Row are just beautiful.pic.twitter.com/hi2YqZimUi

— World Cup 2026 Daily (@TotalFootball) June 23, 2026

Nga ana tjetër, Solbakken theksoi se bëhej fjalë vetëm për një argëtim për tifozët gjatë turneut.

“Kjo është diçka e veçantë për këtë Botëror. Është argëtuese për tifozët, por nuk do ta vazhdojmë pas turneut”, deklaroi trajneri.

Haaland skeptik para Francës

Norvegjia do të përballet me Francën në ndeshjen e fundit të grupit më 26 qershor, por Haaland nuk u tregua shumë optimist.

“Nuk po mendoj shumë për atë ndeshje tani. Ne tashmë jemi kualifikuar. Ata ndoshta do të na mposhtin dhe ndoshta do ta fitojnë edhe gjithë turneun”, tha ai.

Megjithatë, sulmuesi i Manchester City po kalon një formë fantastike. Ai ka shënuar katër gola në dy ndeshjet e para të Botërorit dhe ndan vendin e dytë në listën e golashënuesve me Kylian Mbappé, ndërsa në krye qëndron Lionel Messi me pesë gola.

“Po e shijoj shumë këtë turne. Që nga debutimi im me Norvegjinë në vitin 2019, gjithmonë kam shijuar të luaj për kombëtaren”, përfundoi Haaland. /GazetaExpress/