“False dhe të dëmshme”, agjencia që e përfaqëson Viniciusin flet për lidhjet e mundshme me Arsenalin

Futboll

Gazeta Express

03/08/2026 0:00

Përfaqësuesit e yllit të Real Madridit, Vinicius Junior, kanë mohuar me forcë raportimet që i cilësojnë si “të rreme dhe të dëmshme” lidhur me të ardhmen e sulmuesit brazilian.

Reagimi vjen mes spekulimeve të shumta që e lidhin atë me një transferim të mundshëm te Arsenali.

Agjencia “Roc Nation Sports International”, e cila përfaqëson Viniciusin, publikoi të dielën një deklaratë të ashpër, duke kritikuar mënyrën se si është raportuar për klientët e saj gjatë afatit kalimtar.

Edhe pse në deklaratë nuk përmenden raportime specifike, ajo vjen në një kohë kur zërat për një largim të mundshëm të brazilianit nga “Santiago Bernabeu” janë shtuar ndjeshëm.

Presidenti i Roc Nation Sports International, Michael Yormark, reagoi përmes një postimi në Instagram.

“Roc Nation Sports International dhe i gjithë ekipi ynë nuk mund të qëndrojnë duarkryq kur media joprofesionale dhe e painformuar publikon informacione të rreme dhe të dëmshme vetëm për të tërhequr vëmendje. Kjo është veçanërisht e papranueshme kur sulmohen klientët tanë pa asnjë bazë. Kjo është shqetësuese, e dëmshme dhe shpifëse. Mediat dhe gazetarët duhet të mbajnë më shumë përgjegjësi për atë që publikojnë”, deklaroi Yormark.

Pavarësisht këtij reagimi, Vinicius vazhdon të jetë një nga emrat më të përfolur në tregun e transferimeve. 26-vjeçari po hyn në fazën e fundit të kontratës së tij me Real Madridin, ndërsa raportimet sugjerojnë se bisedimet për rinovimin nuk kanë sjellë ende një marrëveshje.

Kjo situatë ka zgjuar interesimin e Arsenalit, i cili thuhet se është i gatshëm të thyejë strukturën e pagave dhe të ofrojë marrëveshje të favorshme për të drejtat e imazhit, në mënyrë që të sigurojë shërbimet e njërit prej futbollistëve më të mirë në botë.

Interesimi i klubit londinez për Viniciusin është raportuar prej kohësh, megjithëse deri më tani nuk ka pasur negociata zyrtare mes Arsenalit dhe Real Madridit.

Trajneri i Arsenalit, Mikel Arteta, nuk i ka shuar spekulimet. I pyetur gjatë turneut parasezonal për mundësinë e transferimit të Viniciusit, ai u përgjigj me një buzëqeshje, duke theksuar se klubi vazhdon të kërkojë përforcime.

“Ne tashmë jemi aktivë në përpjekjet për ta përmirësuar dhe zhvilluar ekipin, kjo është e qartë. Presim të ketë lëvizje në javët e ardhshme, sepse duam të bëhemi më të fortë, ashtu si çdo klub tjetër. Mjafton të shihni tregun e transferimeve dhe atë që po bëjnë rivalët tanë”, deklaroi Arteta./GazetaExpress/