Tema e liberalizimit të vizave për kosovarët ka nxjerrë edhe njëherë në sipërfaqe gjithë kundërshtitë dhe poshtërsitë e politikës – kosovare dhe europiane – sa i përket këtij procesi. Vështirë të vendoset se kush meriton medalje për poshtërsi më të madhe.
Imer Mushkolaj
Bashkimi Europian zgjodhi edhe njëherë t’i ndëshkojë kosovarët, duke mos i lejuar të udhëtojnë lirshëm në zonën Schengen. Shefat e shteteve të BE’së sërish dhanë fjalë të mira për mundësinë e heqjes së vizave, por nuk premtuan asnjë veprim konkret. Kjo shkaktoi neveri në mesin e qytetarëve të Kosovës, të cilët janë të vetmit në Europë që duhet të presin para ambasadave për të marrë një vizë.
Debati i risjellur në publik për vizat risolli edhe kritika e kundërkritika të partive opozitare dhe partisë në pushtet. Më i zëshmi në baltosjen e pushtetarëve aktualë u tregua ish-kryeministri Isa Mustafa, të cilit duket se ende nuk i ka kaluar inati ndaj Vjosa Osmanit.
Osmanin, bashkë me Albin Kurtin dhe Shpejtim Bulliqin ai i quajti bllokues të liberalizimit në vitet 2015-2016, pasi që atëherë kundërshtonin demarkacionin me Malin e Zi. Por, Mustafa “harroi” se pikërisht këtë “bllokuese”, Vjosa Osmanin, në vitin 2019 ai dhe partia që udhëhiqej nga ai, LDK, e nominuan për kryeministre.
Tash sa vjet në Kosovë muhabeti për vizat është shndërruar në betejë për përfitime politike. Lëvizja Vetëvendosje akuzohet se i ka lënë kosovarët me viza, pasi që në kohën kur ato mund të hiqeshin, organizonte protesta të dhunshme dhe kundërshtonte demarkacionin. Ndërkaq, eksponentë të partisë në pushtet akuzojnë qeveritë e kaluara se vizat nuk janë liberalizuar për shkak të mospunës së tyre në luftimin e korrupsionit dhe krimit të organizuar. Poshtëri mbi poshtërsi.
E historiku i premtimeve politike për heqjen e vizave dëshmon se kjo çështje është keqpërdorur disa herë për përfitim poenësh politikë. Nuk kanë ndryshuar veç pritjet e qytetarëve para ambasadave dhe shpenzimet disa qindra euroshe për viza.
* * *
Në sagën e heqjes së vizave për kosovarët rol kyç ka luajtur, natyrisht, Bashkimi Europian. Të paktën para nja katër vjetësh zyrtarët e Brukselit konfirmuan se Kosova i ka përmbushur të gjitha kriteret për liberalizim.
Përveç kritireve teknike, BE vendosi për Kosovën edhe kritere politike. Ndonëse jo zyrtarisht, një kusht i tillë ishte ratifikimi në Kuvend i marrëveshjes për demarkimin e kufirit me Malin e Zi. Kur marrëveshja kaloi, më 2018, zyrtarë të BE’së thanë se ishte koha për heqjen e vizave. Paraprakisht, nja dy vjet opozita e atëhershme me protesta të dhunshme kundërshtoi demarkacionin. LDK e PDK akuzojnë VV’në se, po të kalonte demarkacioni, vizat Kosovës do t’i hiqeshin atë kohë – bashkë me Gjeorgjinë. Por, katër vjet pas premtimit të Federica Mogherinit, vizat ende nuk janë hequr. Brukseli vazhdimisht arsyetohet se është përgjegjësi e shteteve anëtare veç e veç që t’i thonë “po” procesit. Problematike janë parë Holanda dhe Franca, edhe pse këtë javë u tha se qëndrimi i Holandës është zbutur.
Megjithatë, edhe pse Brukseli nuk e thotë zyrtarisht, duket se procesi i liberalizimit për Kosovën është i lidhur me dialogun Kosovë-Serbi. BE nuk ka çfarë t’i ofrojë Kosovës në këmbim të arritjes eventuale të marrëveshjes, andaj heqja e vizave mbetet “karrotë” e vetme.
Ndonëse u vlërsua se asnjëherë nuk kishte pasur qasje më pozitive sa i përket liberalizimit të vizave për kosovarët, sesa në samitin e BE’së kësaj jave, konkretisht nuk ka lëvizur asgjë, nuk është dhënë asnjë premtim dhe asnjë afat se kur një gjë e tillë mund të ndodhë.
Poshtërsia e BE’së karshi Kosovës vazhdon, ashtu si dhe diskriminimi kundër qytetarëve të Kosovës.
* * *
Është poshtërsi të përvetësosh procesin e liberalizimit të vizave për të përfituar poenë politikë. Kjo ka ndodhur dhe vazhdon të ndodhë në Kosovë. Po ashtu, është poshtërsi të premtosh heqjen e vizave, të konfirmosh disa herë se kriteret janë plotësuar dhe të mos mbash premtimet, siç ka vepruar Bashkimi Europian.
Procesi i heqjes së vizave për Kosovën po zgjat tash një dekadë, ndërkaq për vendet e rajonit ka zgjatur më së shumti tri vjet. Nuk ka asnjë shpjegim pse BE po vazhdon t’i mbajë kosovarët si në burg, kur ata e meritojnë lëvizjen e lirë.
Nëse korrupsioni dhe krimi i organizuar nuk po u luftuakan mjaftueshëm, atëherë në këtë aspekt më mirë nuk qëndrojnë as vendet e rajoinit, qytetarët e të cilëve lëvizin lirshëm tash sa vjet. Raporte organizatash kredibile ndërkombëtare e vlerësojnë Kosovën më mirë në raport me vendet fqinje, sa i përket perceptimit për nivelin e korrupsionit.
BE nuk ka asnjë arsye që të mos e jep dritën e gjelbër për lëvizjen e lirë të kosovarëve. Çdo zvarritje në këtë drejtim vetëm sa do ta shtojë skepticizmin e kosovarëve dhe do t’iu jep të drejtë atyre që besojnë se Europa po tregohet raciste karshi këtyre qytetarëve. Shumëkush meriton medalje për poshtërsi në gjithë këtë muhabet.
Dashamirës të kuzhinës italiane në Prishtinë, përgatituni për të shijuar pasta, pica dhe sallata të shijshme, pasi Vapiano është...