Bayerni ka interesim konkret për yllin e Serie A, ky i fundit është i hapur për një kalim në Gjermani

Futboll

Gazeta Express

08/05/2026 19:44

Sipas raportimeve të Sacha Tavolierit, Bayern Munichu ka shfaqur interes konkret për yllin e Atalantës, Charles De Ketelaere: mesfushori belg thuhet se tashmë ka dhënë miratimin për një transferim të mundshëm dhe bisedimet klub me klub pritet të nisin së shpejti.

Sipas ekspertit të transferimeve të “Sky Sport CH”, Tavolieri, De Ketelaere tashmë ka dhënë “dritën jeshile” për një lëvizje të mundshme drejt “Allianz Arena” në verë, kështu që marrëveshja për kushtet personale nuk pritet të jetë problem.

Bayern Munichu pritet të fillojë shumë shpejt bisedimet me Atalantën për të kuptuar nëse klubi italian është i gatshëm ta shesë dhe me çfarë çmimi.

De Ketelaere, 25 vjeç, ka shënuar pesë gola dhe ka dhënë shtatë asistime në 39 paraqitje në të gjitha garat këtë sezon.

Ai është në sezonin e tretë te Atalanta, pasi u transferua në Bergamo fillimisht në huazim për 3 milionë euro nga Milani në vitin 2023, para se transferimi të bëhej i përhershëm një vit më vonë për rreth 24 milionë euro.

Kontrata e De Ketelaeres në “Gewiss Stadium” skadon në qershor të vitit 2028./GazetaExpress/