Babai i Erling Haalandit i pakënaqur me eliminimin e Norvegjisë: Urime Bellinghamit dhe referit…

Futboll

Gazeta Express

12/07/2026 16:20

Pasi pa Erling Haalandin të eliminohej nga Kupa e Botës, babai i tij, Alfie Haaland, reagoi në rrjetet sociale me një mesazh të shkurtër prej pesë fjalësh.

Erling Haalandi zhvilloi një turne shumë të mirë, duke shënuar në çdo ndeshje të Kupës së Botës deri në përballjen ndaj Anglisë.

Megjithatë, anglezët arritën ta neutralizonin sulmuesin e Manchester Cityt, me Marc Guehin, John Stonesin dhe Nico O’Reillyn që kufizuan maksimalisht ndikimin e tij në lojë.

Ndeshja pati disa momente vendimtare dhe kthesa të mëdha, me vendime të diskutueshme të arbitrave në të dyja anët, ndërsa një gol i pazakontë i Norvegjisë u pasua nga një gabim i portierit që i hapi rrugën golit të fitores së Jude Bellinghamit.

Megjithatë, më shumë debat ka shkaktuar gjykimi i arbitrave, ndërsa Alfie Haaland nuk hezitoi të shpërthejë me kritika.

Goli i parë i Anglisë u bë objekt polemikash pas ndeshjes, pasi futbollistët norvegjezë pretenduan se topi kishte prekur kabllon e kamerës ajrore (spidercam), gjë që ndryshoi trajektoren e tij dhe bëri që ai të binte në këmbët e Elliot Anderson, nga ku nisi aksioni i golit.

Norvegjisë iu anulua gjithashtu një gol, pasi arbitri konstatoi se Erling Haalandi kishte bërë faull gjatë ndërtimit të aksionit para një goditjeje nga këndi, duke zbatuar një rregull të ri.

Edhe Anglia pati përplasje me VAR-in, pasi arbitri i videos anuloi një penallti të akorduar fillimisht për Djed Spence.

Megjithatë, Alfie Haalandi la të kuptohej se arbitri ishte në favor të Anglisë.

“Urime Bellingham dhe arbitrit”, shkroi ai në platformën “X”, në një përgjigje ndaj një postimi të Fabrizio Romanos.

Well done Bellingham and referee.

— Alfie Haaland (@alfiehaaland) July 11, 2026

Babai i Haalandit u pa gjithashtu duke bërë gjeste fyese në drejtim të Djed Spence, pasi ky i fundit kishte imituar një simulim me gjeste gjatë ndeshjes.

Ish-futbollisti norvegjez kritikoi edhe sulmuesin Alexander Sørloth, i cili humbi një mundësi të artë në pjesën e parë, duke mos ia pasuar topin Erling Haalandit.

“Njerëzit do të flasin për polemikën me spidercam. Do të flasin për golin e anuluar. Por për mua, momenti më i rëndësishëm erdhi kur Norvegjia pati mundësinë ta vriste ndeshjen.

Alexander Sørloth kishte lojtarë që po lëviznin. Kishte opsione. Shokët e skuadrës po i kërkonin pasimin. Në vend të kësaj, ai vendosi të vepronte i vetëm. Futbolli është i pamëshirshëm. Një vendim, një pasim, një moment mund të ndryshojë të gjithë një turne. Norvegjia tregoi guxim dhe duhet të jetë krenare, por kur e rikujtoj këtë ndeshje, vazhdoj të mendoj për atë aksion. Dukej si rasti ideal për t’i vënë gozhdën e fundit arkivolit të Anglisë”, tha ai.

Pavarësisht eliminimit, Haalandi ka arsye të jetë krenar për paraqitjet e tij në Kupën e Botës, veçanërisht për performancën ndaj Brazilit, e cila pritet të mbetet një nga momentet më të mira të karrierës së tij./GazetaExpress/