Atalanta kalon në çerekfinale të Kupës së Italisë, përballje shqiptare Djimsiti vs Zhegrova në raundin tjetër

Sport

Gazeta Express

03/12/2025 17:55

Atalanta arriti një fitore bindëse 4-0 ndaj Genoas, duke siguruar kalimin në çerekfinalet e Coppa Italia, ku do të përballet me Juventusin – dhe kjo ndeshje sjell një duel të veçantë për ne: Berat Djimsiti kundër Edon Zhegrovës, dy shqiptarët që luajnë në Serie A.

Golat për Atalantën u shënuan nga: Berat Djimsiti, Marten De Roon,Mario Pasalic, Honest Ahanor.

Atalanta dominoi ndeshjen, me Djimsitin që hapi serinë e golave me një goditje të saktë me kokë pas asistit të Zalewskit.

La Dea goditi dy herë shtyllën në pjesën e parë, ndërsa Genoa mbeti me 10 lojtarë në minutën e 36 pas daljes me të kuqe të Seydou Finit.

Në pjesën e dytë, De Roon shënoi një supergol me vole, Pasalic realizoi golin e tretë në minutën 81, dhe Ahanor vulosi rezultatin me golin e tij të parë për klubin – të cilin nuk e festoi, pasi vinte kundër ish-skuadrës së tij.

Tani Atalanta përgatitet për çerekfinalen kundër Juventusit, një duel që pritet me interes të madh edhe për faktin se do të kemi një përballje mes dy shqiptarëve: Djimsiti vs Zhegrova.
Ndeshja do të zhvillohet mes 4 dhe 11 shkurt 2026. /GazetaExpress