Arne Slot pritet të qëndrojë te Liverpooli edhe sezonin tjetër

Futboll

Gazeta Express

21/04/2026 16:00

Arne Slot pritet të vazhdojë si trajner i Liverpoolit edhe sezonin e ardhshëm, sipas “Sky Sports News”, ndërsa klubi po i afrohet kualifikimit në Ligën e Kampionëve.

Çdo dyshim për të ardhmen e holandezit duket se po shuhet me shpejtësi, pasi është krijuar një diferencë prej shtatë pikësh mes Liverpoolit në vendin e pestë dhe Chelseat në vendin e gjashtë.

Vendi i pestë këtë sezon siguron pjesëmarrjen në Ligën e Kampionëve, pas avancimit të Arsenalit në gjysmëfinale – dhe forma e Liverpoolit është përmirësuar, ndërsa Chelsea është në rënie.

Slot, i cili e udhëhoqi Liverpoolin drejt titullit të Premierligës sezonin e kaluar, ka qenë nën presion gjatë sezonit të tij të dytë, me “Reds” që pritet ta mbyllin sezonin pa trofe dhe larg ritmit të vendosur nga Arsenali dhe Manchester City.

Duke folur në “Monday Night Football”, Jamie Carragher tha: “Puna e Arne Slot është diskutuar gjatë gjithë sezonit. Kemi folur shumë për të në këtë emision. Ka ndoshta një ndarje mes tifozëve të Liverpoolit nëse ai duhet të qëndrojë apo të largohet, por nga ajo që dëgjoj, Slot do të jetë trajner i Liverpoolit sezonin e ardhshëm nëse sigurojnë Ligën e Kampionëve – dhe aktualisht duket se do ta arrijnë këtë”.

“Sky Sports News” konfirmon këtë, pas një sezoni me shumë spekulime për të ardhmen e tij, ndërsa një sezon tranzicioni në “Anfield” ka sjellë zhgënjime brenda dhe jashtë fushës.

Slot pritet të ketë mbështetjen e drejtuesve përpara verës, ku pritet të bëhen përforcime në skuadër, sidomos pas njoftimit se Mohamed Salahu do të largohet.

Sulmuesi i RB Leipzigut, Yan Diomande, është një nga objektivat kryesorë për repartin ofensiv, ndërsa po shqyrtohen edhe disa pozita të tjera.

Ndërkohë, kapiteni Virgil van Dijk theksoi se Liverpooli duhet të bëjë më mirë, pavarësisht fitores në derbin e Merseyside ndaj Evertonit në “Hill Dickinson”.

Ai shënoi golin vendimtar në fund, duke e vendosur skuadrën në një pozitë të mirë për kualifikim në Champions.

Liverpooli ende duhet të përballet me dy nga pesë skuadrat e para dhe gjithashtu me Chelsean në garën për një vend në Champions.

“Kemi edhe pesë ndeshje kundër skuadrave që luftojnë për vendet në Champions”, tha Van Dijk për “Sky Sports”.
“Çdo ndeshje është e madhe. Jemi shumë të zhgënjyer me sezonin që po bëjmë, duke parë cilësinë që kemi. Është nën standard. Por duhet të vazhdojmë të luftojmë dhe të nxjerrim maksimumin nga ky sezon i dobët. Kjo është realiteti. Fitorja ndaj Evertonit ishte shumë e rëndësishme dhe tani na pret Crystal Palace në shtëpi, një skuadër që nuk e kemi mposhtur për shumë kohë. Kjo situatë nuk është në nivelin e Liverpoolit, sipas mendimit tim, por është realiteti dhe ishte shumë e rëndësishme që fituam. Jam i lumtur që ia dolëm”, e mbylli ai./GazetaExpress/