Argjentinë–Egjipt shkruan historinë në Google, ndeshja gjeneron rekord kërkimesh

AutoTech

Gazeta Express

13/07/2026 13:10

Ndeshja e 1/8 së finales së Kupës së Botës mes Argjentinës dhe Egjiptit ka hyrë në histori edhe jashtë fushës së lojës, duke gjeneruar nivelin më të lartë të kërkimeve të regjistruar ndonjëherë në Google.

Lajmin e bëri të ditur nënkryetari i lartë i kompanisë për njohuri dhe informacion, Nick Fox, i cili deklaroi se Google Search kishte “thyer të gjitha rekordet e mëparshme të përdorimit”.

Kulmi i kërkimeve u regjistrua menjëherë pas golit vendimtar të Argjentinës, me të cilin kampionët në fuqi të botës kompletuan përmbysjen dhe fituan me rezultat 3:2 ndaj Egjiptit.

Sipas raportimeve, vala më e madhe e interesimit erdhi pasi Enzo Fernandez realizoi golin e fitores në fundin e ndeshjes.

Ky moment shkaktoi një rritje të jashtëzakonshme të kërkimeve në mbarë botën, kryesisht për ndeshjen, Lionel Messin dhe Kupën e Botës.

Megjithatë, Google nuk ka publikuar të dhëna konkrete për numrin e kërkimeve të regjistruara dhe as metodologjinë e përdorur për matjen e rekordit.

Pavarësisht mungesës së shifrave të sakta, deklarata e një prej drejtuesve të lartë të kompanisë tregon për përmasat globale të interesimit që prodhoi dueli mes Argjentinës dhe Egjiptit.

Fitorja dramatike 3:2 jo vetëm që e dërgoi Argjentinën më tej në turne, por e shndërroi ndeshjen edhe në një nga ngjarjet sportive me ndikimin më të madh digjital në historinë e Google. /GazetaExpress/