Agjenti i Bruno Guimaraes ndez spekulimet, jep sinjale për transferimin tek Arsenali së bashku me Vinicius Junior

Futboll

Gazeta Express

31/07/2026 19:43

Agjenti i Bruno Guimaraes ka shtuar edhe më shumë zërat për një transferim të mundshëm të mesfushorit brazilian te Arsenali, duke përfshirë në spekulime edhe yllin e Real Madridit, Vinicius Junior.

“Topçinjtë” vazhdojnë të lidhen ngushtë me të dy futbollistët, teksa synojnë të përforcojnë skuadrën para mbylljes së afatit kalimtar veror.

Guimaraes është përfolur prej muajsh si një objektiv i Arsenalit, i cili dëshiron ta transferojë mesfushorin e Newcastle United në “Emirates Stadium”.

Raporte të ndryshme kanë bërë të ditur se Arsenali është pranë arritjes së një marrëveshjeje për 27-vjeçarin, me vlerën e transferimit që mund të arrijë në rreth 77 milionë funte.

E ardhmja e Guimaraes është bërë edhe më e paqartë pas largimit të Eddie Howe nga posti i trajnerit të Newcastle.

Madje, sipas raportimeve, Howe kishte vendosur të largohej nga klubi me bindjen se Guimaraes do të transferohej përfundimisht tek Arsenali.

Mes gjithë këtyre spekulimeve, agjenti i futbollistit, Alexis Malavolta, ka ndezur edhe më shumë zërat.

Ai publikoi në “Instagram Story” një fotografi ku Bruno Guimaraes dhe Vinicius Junior festojnë së bashku gjatë një ndeshjeje me Kombëtaren e Brazilit.

Ky postim është interpretuar si një sinjal i mundshëm se të dy futbollistët mund të përfundojnë te Arsenali para mbylljes së merkatos më 1 shtator.

Arsenali vazhdon të ketë interes edhe për Vinicius Junior, pavarësisht raportimeve të kësaj jave që sugjeronin se braziliani pritet të qëndrojë te Real Madridi edhe pas kësaj vere.

Sipas “football.london”, është ende herët për të përcaktuar të ardhmen e 26-vjeçarit, ndërsa Arsenali mbetet një nga klubet në garë në rast se Vinicius vendos të largohet nga “Bernabéu”.

Klubi londinez ka qenë në kërkim të një sulmuesi të ri gjatë gjithë merkatos verore dhe më parë ishte lidhur edhe me Morgan Rogers, përpara se anglezi të transferohej te Chelsea nga Aston Villa për 117 milionë funte.

Për momentin, mbetet të shihet se çfarë do të ndodhë me të ardhmen e Bruno Guimaraes dhe Vinicius Junior, të cilët aktualisht ndodhen ende në pushimet verore pas angazhimit me Brazilin në Kupën e Botës 2026./GazetaExpress/