UEFA mbledh federatat anëtare në takim urgjent, diskuton bojkotin e Botërorit 2030

Futboll

Gazeta Express

30/07/2026 17:14

Federatat anëtare të UEFA-s kanë zhvilluar një mbledhje urgjente virtuale për të diskutuar planet e presidentit të FIFA-s, Gianni Infantino, për privatizimin e Kupës së Botës.

Në takimin e mbajtur të enjten morën pjesë përfaqësuesit e 55 federatave evropiane, të cilët shqyrtuan propozimin e FIFA-s për shitjen e aksioneve të Botërorit tek investitorë privatë. Sipas raportimeve të The Times, gjatë diskutimeve u përmend edhe mundësia e bojkotimit të Kupës së Botës 2030 nga Anglia dhe vendet e tjera anëtare të UEFA-s nëse plani realizohet.

Plani i Infantinos ka shkaktuar reagime të forta në futbollin evropian dhe është krahasuar me projektin e Superligës Evropiane të vitit 2021, i cili u rrëzua pas kundërshtimeve masive.

Presidenti i FIFA-s u ka dhënë afat 211 federatave anëtare deri më 19 shtator për të miratuar projektin, i cili parashikon përfitime të konsiderueshme financiare për federatat që e mbështesin.

Megjithatë, qëndrimi i UEFA-s mund të jetë vendimtar. Një bojkot i mundshëm nga kombëtaret evropiane do të ulte ndjeshëm vlerën komerciale të turneut dhe mund të dekurajonte investitorët privatë, duke vënë në pikëpyetje realizimin e gjithë projektit.