Ish-bankieri i JPMorgan që akuzoi shqiptaren për abuzim seksual, braktiset nga avokati disa orë para paraqitjes në gjykatë

Lajme

Gazeta Express

26/05/2026 17:45

Ish-bankieri i JPMorgan Chase, i cili ka ngritur një padi për abuzim seksual kundër shefes së tij, është braktisur papritur nga avokati vetëm pak orë para një seance gjyqësore.

Chirayu Rana, 35 vjeç, u braktis nga avokati i njohur i New York-ut, Daniel Kaiser, sipas dokumenteve të siguruara nga DailyMail, pak para se të paraqiteshin në gjykatë të martën.

Kaiser, i cili më parë kishte tërhequr vëmendje mediatike duke përfaqësuar viktimat e Jeffrey Epstein, paraqiti një kërkesë për t’u “liruar” nga detyra si avokat i Rana-s.

Sipas dokumenteve, Rana tani do ta përfaqësojë veten në gjykatë “pro se” derisa të gjejë një avokat të ri në çështjen e tij kundër ekzekutives bankare Lorna Hajdini, 37 vjeçe.

Kaiser pritej të paraqitej të martën për të argumentuar që Rana të identifikohej zyrtarisht vetëm si “John Doe” në procedurat gjyqësore, pasi fillimisht kishte ngritur padinë në mënyrë anonime, por më pas u identifikua kur padia e tij u bë virale.

Kjo ndodh vetëm disa ditë pasi Hajdini ngriti pretendime për shpifje kundër Rana-s, duke e akuzuar atë se e kishte poshtëruar me pretendimet se ajo e kishte kthyer në një “skllav seksual” kur ishte shefja e tij.

Në padinë e tij, Rana pretendonte se Hajdini e kishte detyruar të kryente akte seksuale poshtëruese gjatë kohës që punonin në divizionin e financave me leverage të bankës, duke e akuzuar gjithashtu se e kishte droguar dhe abuzuar në baza racore.

Hajdini i mohon me forcë këto akuza, ndërsa JPMorgan deklaroi se një hetim i brendshëm nuk gjeti asnjë provë për sjellje të pahijshme dhe se pretendimet e Rana-s “nuk kanë bazë”.