Dhjetëra qytetarëve në RMV u janë vjedhur paratë duke i mashtruar përmes gjobave të rreme nga “Qyteti i Sigurt”

Maqedoni

Gazeta Express

25/05/2026 14:54

“Mesazhe mashtruese për pagesë të gjobave të trafikut” – ky ishte titulli i paralajmërimit që Ministria e Punëve të Brendshme (MPB) u dërgoi qytetarëve sepse vuri re mashtrime të shpeshta drejtuar atyre. Megjithatë, dhjetrëra qytetarë ranë pre e mashtrimeve, sipas të dhënave që Kolegium.mk mori nga MPB.

“Gjithsej 17 ngjarje u regjistruan për mesazhe të rreme të dërguara për pagesën e gjobave të supozuara për shkelje të trafikut, nga të cilat në 10 raste qytetarëve iu morën paratë”, tha MPB për Kolegium.mk.

Deri më tani, nuk ka informacion se nga vijnë këto mesazhe – nëse autoritetet i kanë gjetur tashmë mashtruesit, nëse është një grup apo individë…

“Aktualisht nuk jemi në gjendje të ndajmë detaje shtesë, duke pasur parasysh se rasti është në procedurë aktive dhe po punohet intensivisht për të. Publiku dhe mediat do të njoftohen në kohën e duhur për çdo informacion të ri dhe rezultatin e hetimit”, tha MPB.

Sipas asaj që është vërejtur deri më tani, disa nga mesazhet mashtruese SMS vijnë nga numra me prefiks të huaj.

“I vetmi prefiks zyrtar ndërkombëtar telefonik për Republikën e Maqedonisë së Veriut është +389. Njoftimet zyrtare nga Ministria e Brendshme dërgohen pa shfaqur numër telefoni – në vend të një numri, shfaqet emri i institucionit”, theksojnë ata.

Paraprakisht, autoritetet shpjeguan gjithashtu se mashtrimi funksionon në një mënyrë të tillë që pasi njerëzit klikojnë në linkun e lënë në mesazh, ai çon në një faqe interneti të rreme të Ministrisë së Brendshme ku mashtruesit i kërkojnë viktimës të fusë targën e automjetit. Pastaj, hapet një dritare e re për viktimën ku është regjistruar vepra e supozuar penale dhe i kërkohet të paguajë 1,500 denarë.

Ndryshe, në RMV qytetarët vazhdimisht pranojnë mesazhe të rreme me mashtrime për vjedhjen e të dhënave personale.

Autoritetet më parë kanë bërë thirrje që qytetarët të mos klikojnë në linqe të panjohura dhe të mos japin të dhëna personale apo bankare përmes mesazheve të tilla.