Reali i vihet pas yllit të Cityt, ky i fundit shton presionin

Futboll

Gazeta Express

22/05/2026 21:40

Real Madridi ka një dritare mundësie për të transferuar Rodri Hernandez këtë verë, por ajo mund të mbyllet shpejt.

Largimi i Pep Guardiolas nga Manchester City ka rritur gjasat që marrëveshja të realizohet, megjithatë Los Blancos ende nuk kanë bërë një lëvizje vendimtare.

Pasi lajmi për largimin e Guardiolas u bë publik të hënën, dolën disa raportime që shpjegonin se Rodri ishte në krye të agjendës së Real Madridit këtë verë dhe se trajneri i mundshëm i ardhshëm, Jose Mourinho, ishte pro transferimit të tij. Një tjetër raport pretendonte gjithashtu se Rodri ishte i interesuar për këtë lëvizje.

Megjithatë, kjo nuk është plotësisht panorama që paraqet Matteo Moretto në “RadioMarca”.

Sipas informacioneve të tij, një kontratë e re për Rodrin, i cili ka vetëm edhe një vit kontratë me Manchester Cityn, është dakorduar dhe para largimit të Guardiolas pritej të nënshkruhej shumë shpejt.

Por Rodri ka vendosur ta shtyjë për momentin firmosjen e saj. Ai dëshiron ta zgjidhë të ardhmen e tij para Kupës së Botës, ndërsa Manchester City po ushtron presion që ai të rinovojë sa më shpejt.

Vetë Rodri ka pranuar se në një moment dëshiron të rikthehet në Spanjë dhe ideja për t’iu bashkuar Real Madridit e tërheq. Los Blancos kanë bërë kontakte fillestare me përfaqësuesit e tij, por ende nuk kanë bërë një lëvizje konkrete – sipas Morettos, nëse ata veprojnë tani, ende ekziston mundësia që marrëveshja të realizohet.

Një nga problemet me të cilat mund të përballet Real Madridi është se mund të mos jetë në gjendje të veprojë shpejt.

Të dielën, klubi do të mësojë nëse do të mbajë zgjedhje presidenciale apo jo, proces që mund të zgjasë të paktën dy javë. Kjo gjithashtu vonon emërimin e trajnerit të ri, i cili pritet të jetë Jose Mourinho nëse fiton Florentino Perez, pasi Alvaro Arbeloa konfirmoi largimin e tij të premten./GazetaExpress/