Zbulohet roli i ri i Pep Guardiolës te City, pas largimit si trajner

Futboll

Gazeta Express

22/05/2026 16:08

Pep Guardiola do të largohet nga posti i trajnerit të Manchester Cityt në fund të sezonit 2025-26, por ai nuk do t’i japë lamtumirën City Football Group.

Ka qenë një periudhë e paharrueshme 10-vjeçare në Manchester për spanjollin, i cili e ka udhëhequr Cityn drejt gjashtë titujve të Premierligës, tre FA Cup, pesë League Cup dhe një Ligë të Kampionëve gjatë një epoke jashtëzakonisht të suksesshme.

Ai do ta drejtojë ndeshjen e tij të fundit kundër Aston Villa të dielën pasdite, përpara se të marrë një lamtumirë emocionale nga tifozët në Etihad Stadium.

Madje, City konfirmoi të premten se tribuna e re e zgjeruar North Stand në “Etihad” do të quhet “The Pep Guardiola Stand”, ndërsa një statujë e Guardiolës do të ndërtohet dhe vendoset pranë hyrjes së saj.

Duke folur për largimin e tij, Guardiola tha se e dinte që kishte ardhur koha për t’u larguar.

“Më mos më pyesni për arsyet pse po largohem,” tha ai.

“Nuk ka një arsye, por thellë brenda vetes e di që kjo është koha ime. Asgjë nuk është e përjetshme; po të ishte, unë do të isha këtu. E përjetshme do të mbetet ndjenja, njerëzit, kujtimet dhe dashuria që kam për Manchester Cityn tim”, tha ai.

Përveç konfirmimit të largimit, City njoftoi gjithashtu se Guardiola ka pranuar një rol të ri si ambasador global, ku do të japë këshilla teknike për klubet brenda City Football Group.

Kjo do të thotë se Guardiola do të punojë në “projekte dhe bashkëpunime specifike” me klube si skuadra italiane Palermo dhe klubi francez Troyes, i cili së fundmi siguroi rikthimin në Ligue 1.

Në një deklaratë emocionale në faqen zyrtare të Manchester Cityt, Guardiola foli hapur për kohën e tij si trajner i klubit.

“Kur erdha, intervista ime e parë ishte me Noel Gallagher. U largova duke menduar: ‘Mirë… Noel është këtu? Kjo do të jetë argëtuese,’” nisi Guardiola.

“Dhe çfarë kohe kemi kaluar bashkë. Mos më pyesni për arsyet pse po largohem. Nuk ka arsye, por thellë brenda vetes e di që kjo është koha ime. Asgjë nuk është e përjetshme; po të ishte, do të isha këtu. E përjetshme do të mbetet ndjenja, njerëzit, kujtimet dhe dashuria që kam për Manchester Cityn tim.

“Ky është një qytet i ndërtuar mbi punën. Mbi mundin. E sheh në ngjyrën e tullave. Nga njerëz që zgjohej herët dhe qëndronin deri vonë. Fabrikat. Pankhursts. Sindikatat. Muzika. Thjesht Revolucioni Industrial dhe mënyra se si ndryshoi botën. Dhe mendoj se arrita ta kuptoj këtë, dhe skuadrat e mia gjithashtu.

“Ne punuam. Vuajtëm. Luftuam. Dhe i bëmë gjërat në mënyrën tonë. Në mënyrën tonë.

“Puna e vështirë vjen në shumë forma. Udhëtimet në Bournemouth, kur humbëm Premierligën, dhe ju ishit aty. Udhëtimet në Stamboll, kur edhe aty ishit me ne.

“E mbani mend sulmin në Manchester Arena, kur ky qytet i tregoi botës se si duket forca e vërtetë? Jo zemërim. Jo frikë. Vetëm dashuri. Komunitet. Bashkim. Një qytet i bashkuar.

“E mbani mend humbjen e nënës sime gjatë COVID-it dhe mënyrën se si ky klub më ndihmoi ta përballoja? Tifozët, stafi, njerëzit e Manchesterit, më dhatë forcë kur më duhej më shumë. Cris, fëmijët e mi, e gjithë familja ime, ju ishit aty si gjithmonë. Khaldoon, edhe ti ishe aty.

“Lojtarët nuk harrojnë – çdo çast, çdo moment, mua, stafin tim, këtë klub, gjithçka. Çfarë kemi bërë, e kemi bërë për të gjithë ju. Dhe ju keni qenë thjesht të jashtëzakonshëm. Ende nuk e dini, por po lini një trashëgimi.

“Kështu që ndërsa koha ime po vjen drejt fundit, jini të lumtur. Oasis janë rikthyer përsëri. Zonja dhe zotërinj, faleminderit që më besuat. Faleminderit që më shtytë përpara. Faleminderit që më dashuruat. Tony Walsh tha në poezinë e tij të paharrueshme: ‘this is the place’. Më fal, Tony: ky është vendi im.”

Guardiola shtoi: “Noel… kisha të drejtë. Ka qenë jashtëzakonisht shumë argëtuese. Ju dua të gjithëve”./GazetaExpress/