Real Madridi ia cakton çmimin Camavingas

Futboll

Gazeta Express

22/05/2026 10:15

Real Madrid pritet të nisë një epokë tjetër të re gjatë verës, me Jose Mourinho që është shumë pranë rikthimit në klub si trajner. Portugezi dëshiron të afrojë një mesfushor të ri – konkretisht Rodri Hernandez – dhe nëse realizohet marrëveshja me Manchester City, atëherë mund të hapet dera për largimin e mundshëm të Eduardo Camavinga.

Sezoni 2025/26 ka qenë shumë i vështirë për Camavingan. Ai është përballur me disa probleme të njëpasnjëshme me lëndime, por edhe kur ka qenë i gatshëm për lojë, nuk ka pasur më të njëjtin rol të rëndësishëm si më parë, kryesisht për shkak të formës së dobët.

Për këtë arsye, janë shtuar spekulimet për të ardhmen e tij te Real Madridi. Drejtuesit e klubit raportohet se janë të gatshëm ta lejojnë largimin e tij gjatë verës nëse vjen një ofertë e mirë, ndërsa sipas gazetarit Yagız Sabuncuoglu, shuma prej 80 milionë eurosh konsiderohet si çmimi ideal për shitjen e francezit.

Gjasat janë që Real Madridi të synojë disa transferime të mëdha përveç një lëvizjeje të mundshme për Rodrin, pasi ka disa reparte në skuadër që duhet të përforcohen para nisjes së sezonit 2026/27 në muajin gusht. Shitja e Camavingas do të ndihmonte financiarisht realizimin e këtyre operacioneve, megjithëse ende nuk është e qartë nëse reprezentuesi francez do të ishte i gatshëm të largohej.

Megjithatë, vendimi final për Camavingan pritet të merret nga Mourinho. Portugezi besohet se mund t’i japë më shumë besim francezit sesa Alvaro Arbeloa, sidomos duke marrë parasysh se Mourinho pritet të favorizojë lojtarët më të konsoliduar në vend të talenteve të rinj si Thiago Pitarch.

Për momentin, mbetet të shihet se si do të zhvillohet situata e Camavingas. Ai vazhdon të ketë admirues të shumtë në Evropë, me Liverpool dhe Chelsea që janë lidhur me një transferim të mundshëm gjatë verës – dhe të dy klubet do të ishin në gjendje të paguanin shumën prej 80 milionë eurosh.