Tuchel “trondit” Anglinë para Botërorit

Futboll

Gazeta Express

21/05/2026 23:59

Thomas Tuchel pritet ta shpallë të premten listën e Anglisë për Kupën e Botës, por dy vendime të mëdha tashmë kanë dalë në publik. Phil Foden dhe Harry Maguire raportohet se nuk do të jenë pjesë e skuadrës që do të udhëtojë drejt SHBA-së, Kanadasë dhe Meksikës.

Sipas BBC, Foden nuk është përfshirë në listën përfundimtare, pavarësisht se së fundmi ishte rikthyer në planet e trajnerit gjerman për kualifikueset dhe miqësoret. Ylli ofensiv i Manchester Cityt ka kaluar një periudhë të vështirë para portës, pasi nuk ka shënuar për klubin që nga dhjetori. Kjo rënie forme duket se i ka kushtuar vendin në formacionin e Pep Guardiolës dhe, në fund, edhe vendin në avionin e Anglisë për Botëror.

Jashtë skuadrës ka mbetur edhe qendërmbrojtësi i Manchester Unitedit, Harry Maguire, i cili konfirmoi për talkSPORT se nuk është përfshirë në grupin prej 26 lojtarësh. 33-vjeçari nuk e fshehu zhgënjimin pas vendimit të Tuchelit.

“Isha i bindur se, pas sezonit që kam pasur, mund të jepja një kontribut të rëndësishëm për vendin tim këtë verë”, tha Maguire.

Mbrojtësi ka rigjetur formën me Manchester Unitedin, që e mbylli sezonin në vendin e tretë dhe do të rikthehet në Ligën e Kampionëve pas tri vitesh mungesë. Tuchel e kishte vlerësuar formën e tij në Manchester dhe e riktheu në kombëtare në mars, për herë të parë që nga shtatori i vitit 2024.

Në atë kohë, Maguire e kishte përshkruar bisedën me trajnerin si një “telefonatë fantastike”, që kishte emocionuar edhe nënën e tij. “Është fantastike të jem përsëri këtu. Më kishte munguar, sepse kur nuk ftohesh më pas gjashtë apo shtatë vitesh si pjesë e rregullt e skuadrës, është e vështirë”, kishte thënë ai.

Pikërisht për këtë arsye, vendimi përfundimtar për ta lënë jashtë Botërorit e ka goditur fort.

“Ky vendim më tronditi dhe më la thellësisht të zhgënjyer”, tha Maguire, duke iu drejtuar trajnerit gjerman. Megjithatë, ai i uroi skuadrës “gjithë të mirat” për turneun.

Maguire kishte humbur edhe Euro 2024 në Gjermani për shkak të një dëmtimi të rëndë muskulor. Para kësaj, ai kishte qenë një nga figurat kryesore të Anglisë për vite me radhë, duke luajtur rol të rëndësishëm në Botërorin 2018, ku Anglia arriti në gjysmëfinale, në Kupën e Botës 2022 në Katar, ku u eliminua në çerekfinale nga Franca, si dhe në Euro 2021, që përfundoi me humbjen dramatike në finale ndaj Italisë në “Wembley”.

Nën drejtimin e Tuchelit, John Stones i Manchester Cityt dhe Ezri Konsa i Aston Villas kanë qenë zgjedhjet kryesore në qendër të mbrojtjes gjatë kualifikueseve të fundit. Marc Guehi pritet të luftojë gjithashtu për një vend titullari, ndërsa Dan Burn i Newcastle Unitedit pritet të jetë pjesë e grupit për turneun.

Vëmendje e madhe mbetet edhe te vendimi për Trent Alexander-Arnold. Mbrojtësi i djathtë i Real Madridit ka bërë vetëm një paraqitje për Anglinë që kur Tuchel mori drejtimin dhe nuk është ftuar nga trajneri për pothuajse një vit.

“Ishte një vendim shumë i vështirë. Nuk kemi asnjë dyshim për talentin e tij apo për atë që mund t’i sjellë një skuadre. Është një vendim i ashpër, ndoshta edhe i padrejtë. Por vendime të tilla duhen marrë dhe ai duhet ta pranojë këtë”, kishte thënë Tuchel në fund të marsit, pasi e la sërish jashtë Alexander-Arnoldin.

Trajneri shpjegoi se kishte ndryshuar sistemin e lojës në vjeshtë dhe se lojtarët e përzgjedhur përshtaten më mirë me atë sistem. Megjithatë, ky arsyetim nuk e bindi legjendën angleze Gary Lineker.

“Mendoj se këtu ka diçka personale, sepse nga ana futbollistike nuk ka asnjë arsye”, tha Lineker në podcastin The Rest is Football. “Në pozicionin e tij ke lojtarë që, me gjithë respektin, nuk janë në të njëjtin nivel me të, sidomos me topin në këmbë.”

Lineker shtoi se dyshon se ka diçka te Alexander-Arnold që Tuchel nuk e pëlqen.

“Mund vetëm të hamendësoj nëse bëhet fjalë për qëndrimin e tij apo për faktin që nuk është i shkëlqyer në mbrojtje. Duhet të ketë diçka pas kësaj, sepse nuk ka absolutisht kuptim”, u shpreh ai. /GazetaExpress/