Legjenda e Unitedit ia propozon klubit të nënshkruajë me Lewandowskin

Futboll

Gazeta Express

16/05/2026 21:20

Rio Ferdinand i ka bërë thirrje Manchester Unitedit që të realizojë një transferim befasues për Robert Lewandowskin pasi sulmuesi konfirmoi zyrtarisht se do të largohet nga Barcelona.

Legjenda e “Djajve të Kuq” beson se veterani mund të sjellë përvojën e nevojshme për të mentoruar talentet e reja të klubit sezonin e ardhshëm.

Ferdinand ka reaguar në rrjetet sociale duke treguar dëshirën që ish-klubi i tij të transferojë Lewandowskin si lojtar të lirë, shkruan “Gazeta Express”.

Me sulmuesin polak që pritet të dalë në treg pa kontratë, Ferdinand mendon se 37-vjeçari përfaqëson një mundësi unike për Michael Carrickun për të forcuar repartin ofensiv me përvojë fituese të nivelit më të lartë.

Duke shkruar në “X”, Ferdinand ishte shumë i qartë për ndikimin që ish-ylli i Bayern Munichut mund të ketë te skuadra aktuale, veçanërisht në zhvillimin e sulmuesit të ri Benjamin Sesko.

“Çfarë njeriu, çfarë lojtari!” tha Ferdinand. “Opsion me përvojë sezonin e ardhshëm në UCL dhe ndihmë në zhvillimin e Seskos?”

Sulmuesi veteran konfirmoi largimin e tij nga Blaugranët të shtunën, duke i dhënë fund një periudhe shumë të suksesshme katërvjeçare në Spanjë.

Pavarësisht moshës së avancuar, Lewandowski ka mbetur jashtëzakonisht produktiv, duke shënuar 119 gola në 191 paraqitje për klubin.

Megjithatë, roli i tij është zvogëluar nën drejtimin e Hansi Flick këtë sezon, pasi ka qenë titullar vetëm në 15 nga 29 ndeshjet e tij në La Liga.

Në një mesazh emocional lamtumire, Lewandowski shprehu mirënjohjen për kohën e kaluar në Kataloni.

“Pas katër vitesh plot sfida dhe punë të vështirë, ka ardhur koha të ec përpara. Po largohem me ndjesinë se misioni është përmbushur. Katër sezone, tre tituj kampionë. Nuk do ta harroj kurrë dashurinë që mora nga tifozët që nga ditët e mia të para. Katalonia është vendi im në tokë. Faleminderit të gjithëve që takova gjatë këtyre katër viteve të bukura,” shkroi sulmuesi.

Ndërsa Ferdinand po shtyn fort për një transferim te “Teatri i Ëndrrave”, Manchester United mund të përballet me konkurrencë të madhe nga rivalët e Premierligës.

Ish-mesfushori i Chelseat dhe Anglisë, Joe Cole, gjithashtu e ka mbështetur idenë e transferimit të polakut si zgjidhje për mungesën e efikasitetit te Blutë, duke sugjeruar se ai mund të jetë mentori ideal për skuadrën e re të klubit.

“Unë do të shikoja Lewandowskin. Kontrata e tij po përfundon te Barcelona, merre për një vit,” tha Cole. “Kjo mund të funksionojë, dikush që vjen dhe ndihmon lojtarët e rinj. Ai është një emër i madh, ka atë autoritet dhe do të ishte një prezencë shumë e madhe në zhveshtore. Mendoj se mund t’i ndihmojë shumë Joao Pedro dhe Liam Delap.”