Studimi: Tërheqja mund të shtrembërojë gjykimin

Fun

Gazeta Express

07/05/2026 21:32

Një studim i ri sugjeron se eksitimi seksual mund të ndikojë në mënyrën se si njerëzit interpretojnë sinjalet romantike, duke i bërë më të prirur të shohin interes edhe aty ku ka vetëm paqartësi.

Sipas studiuesve, tërheqja e fortë ndaj dikujt mund të krijojë një lloj “vizioni tunel”, që e bën më të vështirë të kuptohet nëse personi tjetër nuk është realisht i interesuar.

Autorja kryesore e studimit, Gurit Birnbaum, profesoreshë psikologjie në Universitetin Reichman, tha se eksitimi seksual i bëri pjesëmarrësit dukshëm më të prirur t’i interpretonin ndërveprimet e paqarta në mënyrë optimiste.

“Ata shihnin interes aty ku kishte vetëm pasiguri”, tha ajo, duke shtuar se kjo lidhej edhe me faktin se eksitimi e bënte personin tjetër të dukej më i dëshirueshëm.

Në studim, një grup pjesëmarrësish pa një video me përmbajtje seksuale përpara se të bisedonte online me një person që jepte sinjale të përziera. Një grup tjetër pa një video jo-seksuale dhe më pas zhvilloi të njëjtin lloj bisede.

Pas bisedës, pjesëmarrësit vlerësuan sa tërheqës u dukej bashkëbiseduesi dhe sa të interesuar mendonin se ishte ai ndaj tyre.

Analiza tregoi se personat që kishin parë videon seksuale kishin më shumë gjasa ta shihnin bashkëbiseduesin si të dëshirueshëm dhe ta interpretonin sjelljen e tij si shenjë interesi romantik.

Efekti nuk u vu re vetëm kur refuzimi ishte i qartë dhe i drejtpërdrejtë. Në këto raste, pjesëmarrësit e kuptonin saktë se personi tjetër nuk kishte interes romantik.

Sipas Birnbaum, eksitimi seksual shtrembëron perceptimin kryesisht kur situata lë hapësirë për shpresë. Në fazat e hershme të njohjes, një dozë optimizmi mund të ndihmojë njerëzit të kapërcejnë frikën nga refuzimi dhe të marrin guxim për të ndërtuar lidhje.

Megjithatë, studiuesit paralajmërojnë se kjo mund të ketë edhe kosto. Dëshira mund të zbehë ndjeshmërinë ndaj dëshirave reale të personit tjetër dhe të bëjë që njerëzit ta shohin ndërveprimin jo siç është, por siç do të donin të ishte.

Autorët e studimit, të publikuar në Personality and Social Psychology Bulletin, thonë se kërkimet e ardhshme duhet ta shqyrtojnë këtë fenomen në mjedise më natyrale, si platformat e takimeve online, dhe në faza të ndryshme të zhvillimit të marrëdhënieve.

Sipas tyre, gjetjet tregojnë se gjendjet e brendshme emocionale dhe fizike ndikojnë fuqishëm në mënyrën se si lexojmë sinjalet e të tjerëve. Dëshira, përveçse na shtyn të kërkojmë afërsi, mund të ndryshojë edhe “lentet” përmes të cilave e interpretojmë sjelljen e personit përballë. /GazetaExpress/