Vjen reagimi zyrtar i Real Madridit pas skandalit Valverde-Tchouameni

Futboll

Gazeta Express

07/05/2026 21:30

Real Madrid ka reaguar zyrtarisht pas incidenteve të ndodhura në stërvitjen e ekipit të parë, duke konfirmuar hapjen e procedurave disiplinore ndaj Federico Valverde dhe Aurelien Tchouameni.

Në komunikatën e publikuar nga klubi madrilen thuhet se, pas ngjarjeve të ndodhura gjatë seancës stërvitore të mëngjesit, është vendosur që të hapen dy dosje disiplinore të ndara ndaj dy futbollistëve.

“Real Madrid CF njofton se, pas ngjarjeve të ndodhura këtë mëngjes në stërvitjen e ekipit të parë, ka vendosur të hapë procedura disiplinore ndaj lojtarëve tanë Federico Valverde dhe Aurélien Tchouameni”, thuhet në deklaratën e klubit.

Klubi ka bërë të ditur se vendimet përfundimtare do të publikohen vetëm pasi të përfundojnë procedurat e brendshme disiplinore.

“Klubi do të informojë në kohën e duhur për rezolutat e të dy rasteve, pasi të kenë përfunduar procedurat e brendshme përkatëse”, vazhdon komunikata.

Ky reagim vjen pas raportimeve të shumta për tensione dhe përleshje fizike mes dy mesfushorëve në qendrën stërvitore të Real Madridit, incidente që kanë tronditur atmosferën brenda klubit vetëm pak ditë para sfidave vendimtare të sezonit.