Lewandowski veçse i ka tejkaluar statistikat e tij te Dortmundi me Barcelonën

Futboll

Gazeta Express

27/04/2026 18:20

Robert Lewandowski po vazhdon të shkruajë histori me Barcelonën.

Sulmuesi polak ka kaluar një tjetër rekord personal, duke lënë pas edhe periudhën e tij te Borussia Dortmundi.

Në ndeshjen ndaj Getafes (0-2), Lewandowski zhvilloi ndeshjen e tij të 188-të me Barcelonën, duke kaluar 187 paraqitjet që kishte me Dortmundin.

Por jo vetëm kaq – ai tashmë ka shënuar 118 gola me klubin katalanas (mesatarisht 0.62 gola për ndeshje), duke tejkaluar edhe shifrën e 103 golave (0.55 për ndeshje) që kishte në Gjermani, sipas “Mundo Deportivo”.

Këto statistika tregojnë se edhe në fazën e fundit të karrierës, Lewandowski vazhdon të ruajë një efikasitet shumë të lartë para portës, madje duke përmirësuar shifrat e tij në më pak kohë krahasuar me periudhën te Dortmundi.

Megjithatë, një kapitull mbetet i pakrahasueshëm: koha e tij te Bayern Munichu.

Aty ai realizoi 344 gola në 375 ndeshje gjatë tetë sezoneve, me një mesatare mbresëlënëse prej 0.92 gola për ndeshje.

Performanca e tij te Barcelona vetëm sa forcon statusin e tij si një nga golashënuesit më të mëdhenj në futbollin modern, i aftë të përshtatet dhe të bëjë diferencën edhe në moshën 37-vjeçare.

Deri tani këtë sezon, Lewandowski ka regjistruar 17 gola dhe 4 asistime në 41 ndeshje, me gjithsej 2,118 minuta në të gjitha garat.

Megjithatë, e ardhmja e tij mbetet e hapur.

Ai ka kontratë me Barcelonën deri në qershor 2026 dhe, pavarësisht ofertave të shumta, ende nuk ka marrë një vendim për hapat e ardhshëm në karrierë./GazetaExpress/