Komisioni Ad hoc përfundon intervistimin e kandidatëve për anëtarë të Bordit të RTK-së, 12 emra të propozuar 

Lajme

Gazeta Express

17/04/2026 14:45

Komisioni Ad hoc për përzgjedhjen e kandidatëve për anëtarë të Bordit të RTK-së ka përmbyllë procesin e intervistimit të kandidatëve.

Në një njoftim, Kuvendi i Kosovës tha se “i gjithë procesi ka qenë i hapur, transparent dhe është monitoruar nga shoqëria civile dhe i njëjti është zhvilluar brenda afate të përcaktuara ligjore”.

Për gjashtë pozita për anëtarë të Bordit të Radiotelevizionit të Kosovës, komisioni ka propozuar për votim në seancë plenare dymbëdhjetë kandidatë: Valmirë Thaqi, Flokart Aliu, Gëzim Brahaj, Fatos Mustafa, Arbërore Riza, Xheraldina Cërnobregu, Njomza Beqiri Novosella, Anita Toqi, Lulzim Beqiri, Fatmir Podrimaj, Ilirjan Himaj dhe Avni Zuka.

Prej dymbëdhjetë kandidatëve të propozuar Kuvendi zgjedh gjashtë anëtarë të Bordit të Radiotelevizionit të Kosovës.

Për një pozitë për anëtar të Bordit të Radiotelevizionit të Kosovës, nga radhët e komunitetit serb, komisioni ka propozuar për votim dy kandidatë: Ivana Milić dhe Vidosav Kostović, ndërsa për një pozitë për anëtar të Bordit nga radhët e komuniteteve të tjera jo shumicë, janë propozuar kandidatët Anesa Čolaković dhe Aldin Šabani.