Brenda në hotelin UFO në Uells: Kapsulë “hapësinore”, me teknologji të NASA dhe banjo TARDIS

AutoTech

Gazeta Express

16/04/2026 20:29

Në zemër të fshatit piktoresk të Pembrokeshire në Uells ndodhet një nga akomodimet më të pazakonta në Britani: një “UFO” që duket sikur sapo ka zbritur nga hapësira.

Ky strehim i quajtur Spodnic UFO është një nga tre strukturat unike të kompleksit Melin Mabes, një hapësirë glamping prej rreth katër hektarësh, e krijuar nga Martin Johnson dhe bashkëshortja e tij CarolAnne. Kompleksi u ndërtua mbi një tokë të braktisur rreth një mulliri të shekullit XVII, të blerë mbi një dekadë më parë dhe të shndërruar në destinacion turistik.

“Duket sikur sapo ka zbritur nga hapësira dhe mund të dalin alienët nga brenda,” thotë Johnson, ndërsa prezanton projektin e tij në një dokumentar të Channel 4.

Sipas tij, vendndodhja është aq e fshehur sa shumë vizitorë nuk e dinë se ku po shkojnë derisa mbërrijnë: “Fëmijët shpesh nuk e dinë destinacionin dhe kur shohin UFO-n, fillojnë të vrapojnë të emocionuar.”

Një kapsulë hapësinore e ndërtuar në detaje

Struktura në formë disku është projektuar për të ngjarë me një anije aliene: ka tri “këmbë” mbështetëse, një derë që hapet poshtë, ndriçim që ndryshon ngjyrë dhe detaje të frymëzuara nga dizajni i NASA-s.

Johnson shpjegon se dera është modifikuar nga një sistem ngritës për karrige invalidësh: “E transformuam plotësisht mekanizmin dhe i shtuam susta për ta bërë më të fuqishme. Ka qenë punë e madhe.”

Për efekt dramatik, në momentin e hapjes aktivizohet edhe një makinë tymi, duke e bërë hyrjen të duket si skenë filmash fantastiko-shkencorë.

Brenda: Atmosferë “NASA” dhe fantashkencë

Brenda, hapësira me katër dhoma është e mbushur me elemente të frymëzuara nga eksplorimi hapësinor: fletë izolimi termik të përdorura në industrinë hapësinore, drita LED, figura alienësh, helmeta astronautësh dhe detaje industriale që imitojnë një laborator hapësinor.

Një shkallë çeliku të çon në një kupolë vëzhgimi me teleskop, ku vizitorët mund të shohin yjet në netët e kthjellëta.

Jashtë: Kuzhinë, xhakuzi dhe qielli i hapur

Në pjesën e jashtme ndodhet një kuzhinë e pajisur plotësisht, një zonë ngrënieje dhe një hapësirë relaksi me xhakuzi, e dekoruar me drita të vogla dhe postera hënorë.

Banjo në një TARDIS

Banjoja ndodhet disa hapa larg, brenda një replike të plotë të kabinës telefonike TARDIS nga seriali Doctor Who. Brenda saj gjenden dush, tualet dhe lavaman, të gjitha të vendosura në një hapësirë kompakte të dizajnuar me stil blu karakteristik.

Johnson, fans i serialit, thotë me humor: “TARDIS supozohet të jetë më e madhe nga brenda… por ligjet e fizikës nuk i ndryshuam dot.”

Një projekt i ndërtuar nga një pasion i hershëm

Struktura origjinale është blerë në ankand; më parë ishte përdorur për të fshehur gjeneratorë elektrikë gjatë Lojërave Olimpike të Londrës 2012. Ajo u çmontua në gjashtë pjesë dhe u transportua drejt Uellsit, ku u rindërtua mbi një bazë çeliku për stabilitet në terrenin e butë.

Akomodime të tjera në kompleks

Përveç UFO-s, kompleksi ofron edhe një karavan tradicional të rinovuar për dy persona dhe një shtëpi mbi pemë me rrëshqitëse, krevate të shumtë dhe ngrohje nën dysheme.

Vizitorët mund të porosisin ushqime artizanale ose të sjellin kafshë shtëpiake me një tarifë shtesë.

Melin Mabes është pjesë e një serie dokumentare që eksploron disa nga vendet më të pazakonta në botë, nga strehime në male të largëta në Bolivi deri te hotele historike në Spanjë, duke sjellë histori të njerëzve që i kanë kthyer ëndrrat e tyre në destinacione reale. /GazetaExpress/