Jelena dyshohet se kishte qasje në takime të nivelit të lartë në Kosovë, Prokuroria: Dokumente sensitive nga veriu dhe Policia e Kosovës

Lajme

Gazeta Express

03/04/2026 10:53

Në Gjykatën Themelore në Prishtinë po vazhdon shqyrtimi gjyqësor ndaj të akuzuarës për spiunazh, Jelena Gjukanoviq, ku Prokuroria Speciale ka paraqitur detaje të reja nga aktakuza.

Gjatë seancës, prokurori Bekim Kodraliu ka theksuar se e akuzuara, në kohën kur ka qenë e angazhuar në OSCE, dyshohet se ka pasur qasje në informacione dhe takime të nivelit të lartë me përfaqësues vendorë dhe ndërkombëtarë.

Sipas prokurorisë, dokumentet e administruara përfshijnë analiza të brendshme të sigurisë, veçanërisht në veri të vendit, raportime mbi aktivitetet e Policia e Kosovës, si dhe përmbajtjen e takimeve të nivelit të lartë ku e pandehura dyshohet se ka qenë e pranishme ose ka pasur mundësi të jetë e pranishme.

“Është e rëndësishme të potencohet se këto dokumente përfshijnë analiza të brendshme të sigurisë, posaçërisht në veri të vendit, raportime për aktivitetet e Policisë së Kosovës, si dhe përmbajtjen e takimeve të nivelit të lartë të përfaqësuesve vendorë dhe ndërkombëtarë, ku e pandehura ka mundur të jetë e pranishme,” tha prokurori special i rastit.