Calhanoglu flet pas ndeshjes me Rumaninë, pritet të jetë i gatshëm për Kosovën

Futboll

Gazeta Express

27/03/2026 16:40

Ylli i Interit, Hakan Calhanoglu, është shprehur mirënjohës ndaj klubit dhe trajnerit Cristian Chivu për faktin që i dhanë “kohë” për t’u përgatitur për “play-offin” e Kupës së Botës me Turqinë.

Calhanoglu dhe përzgjedhësi Vincenzo Montella panë Turqinë të mposhtë Rumaninë 1-0 të enjten, duke siguruar kualifikimin në finalen e “play-offit” për Kupën e Botës kundër kombëtares së Kosovës.

Mesfushori turk u zëvendësua në minutat e fundit për shkak të një problemi të dyshuar në pulpë, por sipas raportimeve të fundit nga Italia, bëhet fjalë vetëm për një ngërç dhe ai pritet të jetë i gatshëm për finalen e së martës.

Calhanoglu nuk e përmendi fare këtë problem në intervistën pas ndeshjes për “Sky Sport Italia”.

Megjithatë, ai zbuloi se Chivu e kishte kontaktuar menjëherë pas ndeshjes për t’u informuar mbi gjendjen e tij fizike.

“Ai po interesohej për gjendjen time fizike sepse sapo isha kthyer nga një dëmtim pas një muaji e gjysmë,” tha Calhanoglu.

“Më ka shkruar menjëherë për të pyetur si jam. Për mua, z. Chivu është i veçantë. Jam gjithmonë mirënjohës ndaj tij te Interi sepse më dhanë kohë dhe përgatitje që të jem gati për këtë ndeshje”, shtoi ai.

Calhanoglu ka pasur probleme fizike gjatë vitit 2026, duke munguar shpesh për Interin.

Që nga janari, ai ka bërë vetëm pesë paraqitje në Serie A dhe ka munguar në gjashtë ndeshje të kampionatit për shkak dëmtimesh.

Pas pauzës, Interi do të presë Romën në stadiumin “Giuseppe Meazza” më 5 prill./GazetaExpress/