Vëllai i yllit të Ajaxit që kishte pësuar sulm në zemër, jep përditësime nga shëndeti i tij

Futboll

Gazeta Express

21/11/2025 18:06

Vëllai i Abdelhak Nouri ka zbuluar se ish-ylli i Ajaxit është në gjendje të shfaqë emocione, në një përditësim për tifozët e klubit.

Nouri ishte 20 vjeç kur pësoi arrest kardiak gjatë një miqësoreje me Werder Bremenin në vitin 2017.

I riu u transportua me urgjencë në spital, por fatkeqësisht pësoi dëmtime të trurit si pasojë e incidentit dhe kaloi një vit në koma.

Ai u kthye në shtëpi për t’u kujdesur nga familja e tij në vitin 2020.

Tani vëllai i tij, Abderrahim, ka dhënë një përditësim për gjendjen e 28-vjeçarit, duke zbuluar se ai është në gjendje të shfaqë emocione dhe madje ende e ka humorin e tij karakteristik.

Ai foli për Ajaxin përpara ndeshjes së tyre me Excelsior të shtunën, e cila do t’i dedikohet Fondacionit Nouri, një bamirësi e krijuar për të rritur ndërgjegjësimin rreth rasteve si ai i Nourit.

Ai tha: “Mund t’ju siguroj se ai shfaq emocione të vetëdijshme, shpesh qesh dhe është i lumtur. Ai shfaq edhe emocione më pak të këndshme, gjë që është normale, sigurisht, por ai po shkon mirë. Ai shprehet në mënyrën e tij. Me kohen mëson edhe sinjale të tjera. Për shembull, vetullat e tij ose gjuha e trupit kur lëviz diçka për ne”.

Nouri ka lindur në Amsterdam dhe iu bashkua Ajaxit kur ishte vetëm tetë vjeç.

Ai u rrit nëpër akademi deri pranë ekipit të parë dhe përfaqësoi gjithashtu Holandën në nivelet e të rinjve.

Appie, siç njihej, ishte një figurë e dashur në klub, duke u rritur së bashku me yje si Frenkie de Jong, Matthijs de Ligt dhe Donny van de Beek.

Vëllai i tij shtoi: “Njerëzit që e njohin, e kuptojnë çfarë dua të them. Ai ende ka të njëjtin humor dhe qesh me të njëjtat shaka. Që në situatën e tij ai mund ende të qeshë me ne dhe ende t’i gjejë gjërat qesharake, kjo më bën të buzëqesh. Ndonjëherë shoh video të tij duke folur dhe duke bërë shaka. Është e vështirë të shikosh, por jemi mirënjohës. Jemi të lumtur që është ende me ne”.

Kujdesi për Nourin paguhet nga Ajax pasi klubi arriti një marrëveshje me familjen e tij në vitin 2022.

Klubi e ka tërhequr fanellën me numrin 34 pas kolapsit të tij dhe çdo vit jep trofeun Abdelhak Nouri për talentin më të mirë të akademisë.

Abderrahim tha: “Guxoj të them se po të mos kishim besimin tonë, do ta kishim mbyllur shumë kohë më parë, por nuk e shohim jetën kështu. Kjo është një sprovë për ne dhe besojmë se do të kemi mundësi ta shohim përsëri në shëndet të mirë në parajsë”.

Përvoja e Nourit ka lënë qartë një ndikim të thellë tek ata që e rrethonin.

Shumë lojtarë që kanë luajtur me të kanë zgjedhur numrin 34 në klubet e tyre të reja në nder të tij, përfshirë lojtarin e Bournemouth, Justin Kluivert, i cili e mbajti këtë numër në sezonin e tij të parë me Romën.

Trashëgimia e tij vazhdon edhe përmes punës së Fondacionit Nouri, i cili synon të edukojë njerëzit se çfarë duhet bërë në raste arresti kardiak dhe të financojë vendosjen e defibrilatorëve në zona publike, për të siguruar që njerëzit të marrin ndihmën e nevojshme sa më shpejt./GazetaExpress/