‘Kokëdhimbje’ për Chivun, ylli i skuadrës mund të kërkojë largimin gjatë janarit

Futboll

Gazeta Express

08/11/2025 12:42

“La Gazzetta dello Sport” raporton se Davide Frattesi dëshiron të luajë më shumë, prandaj do të jetë i hapur të dëgjojë oferta gjatë merkatos së janarit.

Mesfushori italian, i cili është pjesë e Kombëtares, është i etur të largohet nga Interi në janar pasi kërkon më shumë minuta lojë.

Sipas “La Gazzetta dello Sport”, Frattesi do të jetë i gatshëm të shqyrtojë ofertat gjatë dritares së transferimeve dimërore, pasi ka mbledhur vetëm 363 minuta futboll në të gjitha kompeticionet këtë sezon.

Frattesi ka startuar vetëm në tre ndeshje në sezonin 2025-26, dhe vetëm përforcimi i ri Andy Diouf ka luajtur më pak minuta se mesfushori italian deri tani.

Ai dëshiron të ketë më shumë minuta në nivel klubesh, gjithashtu për të mos rrezikuar të humbasë thirrjen për Kombëtaren e Italisë për Botërorin 2026, nëse “Azzurrët” kualifikohen.

“Gazzetta” vëren se Frattesi tashmë ka tërhequr interesin e disa klubeve të mëdha gjatë verës, por asnjëra nuk i ka përballuar kërkesat financiare të “Nerazzurrëve”.

Atletico Madrid, Napoli, Roma dhe Juventus kanë sondazhuar disponueshmërinë e mesfushorit.

Interi, megjithatë, nuk ka qenë i gatshëm ta shesë italianin te një rival direkt për titullin, dhe qëndrimi i tyre pritet të mbetet i njëjtë edhe në janar.

Nëse Frattesi largohet, “Nerazzurri” kanë identifikuar tashmë një zëvendësues: Morten Frendrup i Genoas, i cili pritet të jetë i disponueshëm për rreth 20-25 milionë euro./GazetaExpress/