Sejdiu: Nuk them jo nëse më thërret Suedia, por më mirë do të kisha zgjedhur Kosovën

Sport

Gazeta Express

20/09/2022 22:57

Patriot Sejdiu duket se nuk ka vendosur ende se cilin shtet ta përfaqësoj.

Sulmuesi nga Prishtina ka dhënë së fundi një intervistë për “Epxressen”, ku mes tjerash u pyet se ngjyrat e cilit shtet do të mbrojë, transmeton Gazeta Express.

“Nuk them jo nëse thërret Kombëtarja e Suedisë, por më mirë do të kisha zgjedhur Kosovën”, tha ai.

Sejdiu në janar të vitit 2020 kishte debutuar me Kombëtaren U20 të Suedisë, kurse në mars të këtij viti ishte ftuar nga Albert Bunjaki te Kosova U21.

22-vjeçari nuk është ftuar nga Kombëtarja A e Suedisë ose e Kosovës për ndeshjet e shtatorit, teksa mbetet të shihet në vazhdim se cili do të jetë vendimi i tij.

Sulmuesi i krahut të djathtë ka regjistruar 13 paraqitje me Malmon në elitën e futbollit suedez këtë sezon, teksa ka shënuar katër gola.

Patriot Sejdiu me klubin e Malmos ka kontratë të vlefshme deri më 31 dhjetor 2024.

Ai iu bashkua ekipit të parë në janar të vitit 2020, kurse nga 30 janari i atij viti deri më 6 dhjetor luajti në huazim te Dalkurd. /Gazeta Express/