Anton Quni i reagon Driton Selmanajt: Ekipi i ëndrrave në krye me Lumirin

Lajme

Gazeta Express

21/03/2021 13:20

Nënkryetari i Lidhjes Demokratike të Kosovës, Anton Quni, i është kundërpërgjigjur deputetit të kësaj partie, Driton Selmanaj, i cili sot ka kritikuar liderin e partisë, Lumir Abdixhikun. Selmanaj ka thënë se sjellja e Abdixhikut për t’u takuar veçmas me ushtruesen e detyrës së presidentes, Vjosa Osmani, i bën dëm LDK-së, raporton Express

Quni ka shkruar në Facebook se Abdixhiku ishte i fundiut nga liderët e partive që takoi Vjosa Osmanin dhe se këtu nuk kishte as “turr” as “vrap”.

“Lumiri ishte i fundit nga liderët e partive që takoi, zj Osmani; në konsultim gjithëpërfshirës me strukturat e LDK-së. Nuk kishte as “turr” e as “vrap”! LDK-së po i ri-kthehet dinjiteti me hapa shumë të sigurt. “Dream Team” në krye me Lumirin”, ka shkruar Quni.

Këto komente të Qunit vijnë pasi Driton Selmanaj, i cili mbeti jashtë strukturave udhëheqëse të LDK-së, ka thënë se sjellja e Abdixhikut për t’u takuar veçmas me ushtruesen e detyrës së presidentes, Vjosa Osmani, i bën dëm LDK-së.

 “Çdo përpjekje për ta nda apo diferencu Vjosen nga Albini dhe Vetëvendosja, është përpjekje për ta transferu mashtrueshëm votën tek projekti i këtij binomi të dëmshëm politik”, ka shkruar Selmanaj në Facebook.

Ai ka thënë se LDK-ja rrëzohet edhe më shumë me këto veprime, që sipas tij ia humbin dinjitetin edhe atyre që në zgjedhjet e fundit parlamentare votuan për këtë parti.

““Turri dhe vrapi” për ta takuar Vjosen, nuk është asgjë tjetër pos turr për ta rrëzuar edhe më shumë LDK dhe dinjitetin e 110 mijë votuesve QËNDRESTARË të saj. LDK✌️”, ka shkruar Selmanaj.

Abdixhiku u takua të premten me Vjosa Osmanin dhe Albin Kurtin për të diskutuar rreth formimit të institucioneve të reja, përfshirë zgjidhjen e çështjes së presidentit. Pas takimit ai tha se do të kërkojë takim vetëm me Osmanin.

Për këtë, Abdixhiku dje mori edhe miratimin e anëtarëve të Kryesisë së re të partisë, jashtë së cilës e la Driton Selmanajn. Abdixhiku tha se do të jetë në diskrecion të Osmanit që ta caktojë kohën dhe vendin e takimit, derisa theksoi se nuk duan presidente njëpartiake./GazetaExpress/