18-vjeçarit debutues të Chelseat, Jesse Derry iu desh oksigjeni në fushë, pas një lëndimi të tmerrshëm

Futboll

Gazeta Express

04/05/2026 17:17

Ylli i ri i Chelseat, Jesse Derry, pati nevojë për trajtim mjekësor në fushë pas një përplasjeje të rëndë kokë më kokë në zonë.

I riu mori startin e tij të parë në Premierligë për “Blues” në ndeshjen kundër Nottingham Forestit.

Por pas një fillimi kaotik ku Chelsea po humbiste me dy gola brenda 30 minutave të para, 18-vjeçari u përfshi në një përplasje serioze me mbrojtësin e Forestit, Zach Abbott.

Të dy lojtarët u përplasën duke tentuar një top në zonë, duke goditur kokat fort përpara se të binin në tokë.

Gjyqtari Anthony Taylor akordoi penallti në favor të Chelsea pas incidentit.

“Sky” refuzoi të shfaqte përsëritjet e momentit, ndërsa stafi mjekësor hyri me shpejtësi për të ndihmuar lojtarët.

Abbott u kontrollua, por u largua vetë nga fusha, duke u zëvendësuar nga mbrojtësi uellsian Neco Williams.

Ndërkohë, Derry u trajtua në fushë me oksigjen, përpara se të largohej me barelë nën duartrokitjet e tifozëve.

“Sky” tregoi përsëritjen e parë të incidentit vetëm pasi trajtimi i Derryt përfundoi dhe ai u largua nga fusha.

Ai u zëvendësua nga sulmuesi Liam Delap, ndërsa skuadra e drejtuar nga Calum McFarlane kërkonte rikthimin në ndeshje.

Megjithatë, kjo nuk ndodhi, pasi Cole Palmer më në fund ekzekutoi penalltinë – dhjetë minuta pasi ishte akorduar.

Ylli anglez, në formë jo të mirë, goditi poshtë në të majtë të portierit të Forestit, Matz Sels, por ky i fundit reagoi shpejt dhe e priti goditjen.

Palmer nuk arriti ta kontrollonte topin në rikthim dhe e dërgoi jashtë fushe, duke entuziazmuar tifozët vendas.

Ky dëmtim i rëndë erdhi në momentin më të keq për talentin e akademisë, pasi Derry kishte marrë pak minuta këtë sezon, kryesisht në ndeshjet e FA Cup kundër Hull City dhe Wrexham.

Derry është pjesë e kombëtareve të moshave të Anglisë dhe është djali i ish-mesfushorit të Crystal Palace, Shaun Derry.

Ai iu bashkua Chelseat nga klubi londinez verën e kaluar.

Anësori ka zhvilluar 29 paraqitje për ekipin U21 këtë sezon, duke shënuar 12 gola dhe duke dhënë katër asistime./GazetaExpress/