Mjeku kujdestar në Emergjencë jep detaje për gjendjen e të plagosurve në Lupç

Lajme

Gazeta Express

01/05/2024 19:11

Mjeku kujdestar në Klinikën Emergjente të QKUK’së, Agron Citaku, ka thënë se dy nga të plagosurit në Lupç janë në gjendje pak më të rëndë.

Ai tha se dy të tjerët janë në gjendje më të lehtë.

“Diku në orën 16:10 kanë mbërri katër raste me lëndime të shkaktuara nga armët e zjarrit. Trajtimi i tyre ka zgjatur deri tani. Prej tyre, dy janë në gjendje pak më të rëndë, dhe dy janë në gjendje më të lehtë”, tha Citaku para gazetarëve.

Zëdhënësja e Prokurorisë, Laureta Ulaj, ka thënë për Express se nga hetimet fillestare dyshohet se pas një mosmarrëveshje mes disa familjarëve janë lënduar katër persona.

Ulaj shtoi se Prokurori i Shtetit në koordinim me Policinë janë duke i ndërmarrë veprimet hetimore në drejtim të veprës penale “Vrasja në tentativë”, me qëllim të sqarimit të rrethanave të këtij rasti.

“Pas pranimit të informatës nga policia, prokurori kujdestar nga Departamenti i Krimeve të Rënda, ka dalë në vendngjarje. Nga hetimet fillestare dyshohet se pas një mosmarrëveshje mes disa personave (familjarë), në fshatin Lupç, si pasojë e të shtënave me armë zjarri dhe përdorimit të thikës, janë lënduar katër (4) persona, të cilët janë dërguar për ta marrë trajtimin e nevojshëm mjekësor, derisa një (1) person i dyshuar në këtë ngjarje është shoqëruar në stacion policor për tu intervistuar. Prokurori i Shtetit në koordinim me policinë janë duke i ndërmarrë veprimet hetimore në drejtim të veprës penale “Vrasja në tentativë”, me qëllim të sqarimit të rrethanave të këtij rasti”, tha Ulaj për Express.

Rastin për Gazetën Express e ka konfirmuar zëdhënësja e Policisë së Kosovës për Rajonin e Prishtinës, Florie Ahmeti.

Ahmeti ka thënë se hetuesit policor në koordinim me prokurorinë, po ndërmarrin veprimet hetimore për ndriçimin e plotë të rastit.

“Sot rreth orës 16:00 kemi marrë informatën për të shtëna me armë zjarri në fshatin Lupç të Podujevës. Menjëherë pas marrjes së informatës policia ka dalë në vendin e ngjarjes dhe ka ndërmarrë të gjitha veprimet e nevojshme. Bazuar në të dhënat e deritanishme në këtë rast janë plagosur nga arma e zjarrit tre persona, ndërsa një person ka pësuar lëndime nga arma e ftohtë (thikë). Hetuesit policor në koordinim me prokurorinë, po ndërmarrin veprimet hetimore për ndriçimin e plotë të rastit”, ka thënë Ahmeti për Express.