Ylli i Realit nuk do të luajë më derisa aty të jetë Arbeloa

Futboll

Gazeta Express

01/05/2026 12:18

Mesfushori i Real Madridit, Dani Ceballos, ka gjasa të ketë zhvilluar ndeshjen e tij të fundit me klubin, nëse nuk ndodh ndonjë kthesë e papritur në të ardhmen e tij.

Futbollisti spanjoll ka qenë pjesë e “Los Blancos” për nëntë vite, përfshirë edhe periudhën dyvjeçare të huazimit te Arsenal, por tani duket se është shumë pranë largimit këtë verë.

Ceballos ka qenë prej kohësh lojtar me rol dytësor në skuadër, ndërsa në sezonin e fundit të Carlo Ancelottit dhe aktualisht, minutazhi i tij është zvogëluar edhe më shumë. Ai kishte refuzuar një transferim te Olympique Marseille vitin e kaluar, por tani situata e tij duket e pashmangshme për largim. Sipas raportimeve, Ajax ka shfaqur interes për të, ndërsa vetë lojtari preferon një rikthim te Real Betis. Aktualisht ai ka edhe një vit kontratë me Real Madridin.

Sipas Marca, Ceballos nuk do të luajë më për klubin. Ai mungoi në mënyrë të papritur në ndeshjen e javës së kaluar kundër Real Betis, e cila përfundoi 1-1, ndërsa trajneri Arbeloa u përgjigj vetëm se “thërras të gjithë lojtarët që i konsideroj të përshtatshëm”.

Arsyeja kryesore e përjashtimit të tij raportohet të jetë një përplasje me Arbeloa. Të dy kishin pasur mosmarrëveshje edhe më herët gjatë sezonit, ndërsa së fundmi marrëdhënia e tyre është përkeqësuar edhe më shumë pas një debati në zyrën e trajnerit javën e kaluar, pas të cilit është kërkuar ndërprerja e marrëdhënieve profesionale.

Edhe pse Ceballos vazhdon të stërvitet me ekipin, ai praktikisht nuk konsiderohet më pjesë e skuadrës për ndeshjet zyrtare. Ai vetë ka bërë të ditur për bashkëlojtarët se situata është personale mes tij dhe Arbeloa.

Raportet shtojnë se klubi po mbështet trajnerin në këtë konflikt, ndërsa dyshimet janë se Ceballos mund ta ketë përshpejtuar vetë përplasjen për të justifikuar largimin dhe për të lehtësuar një transferim te një klub tjetër. Real Madridi, megjithatë, është i gatshëm ta lejojë largimin e tij këtë verë.