VLEN shprehet i bindur se do të sigurojë Badenter për Ligjin për Përfaqësim të Drejtë: Përgjegjësia politike më e madhe se gjobat financiare

Maqedoni

Gazeta Express

21/05/2026 14:38

-Unë e vlerësoj se përgjegjësia politike është më e madhe se gjoba financiare, tha zëvendëskryeministri Bekim Sali në lidhje me Ligjin për Përfaqësim të Drejtë dhe Adekuat, respektivisht me mungesën e pjesës normative të sanksioneve në këtë ligj.

Sali vlerëson se edhe me shfuqizimin e Balancuesi, përfaqësimi adekuat është rritu. Për paralajmërimin e Ziadin Selës se Ligji në fjalë do të bllokohet me Badenter, Sali tha se opozita duhet të parashtrojë amendamente.

“Z.Sela si do të sillet është e drejtë e tij politike por edhe përgjegjësia e tij politike por edhe përgjegjësia e tyre politike, nëse këtij propozim ligji nuk i propozojnë amendamente me të cilin do ta kishin përmirësuar sipas bindjeve të tyre”, tha Sali.

Ndërkaq, bashkëkryetar i VLEN-it, Bilall Kasami është i bindur se shumica parlamentare do të sigurojë Badenter për ligjin në fjalë.

“Patjetër që do të sigurojmë Badenter, edhe deri tani kemi siguruar Badenter”, theksoi Kasami.