Vetëvendosje: Do t'ia dërgojmë pa vonesa emrin e mandatarit presidentit - Gazeta Express

Ballina

Gazeta Express

17/01/2020 11:55

Vetëvendosje: Do t’ia dërgojmë pa vonesa emrin e mandatarit presidentit

Ballina

Gazeta Express

17/01/2020 11:55

Partia e udhëhequr nga Albin Kurti thotë se do ta bëjë dorëzimin e propozimit për mandatar brenda afateve dhe pa vonesa. Pa saktësuar se kur do të bëhet një gjë e tillë, nuk dihet nëse brenda kësaj kohe LV-ja e LDK-ja do të mundë të merren vesh për bashkëqeverisje, shkruan Gazeta Express

Sot janë bërë 22 ditë qëkur është bërë konstituimi i Kuvendit të Kosovës dhe janë zgjedhur kryetari e nënkryetarët.

Mirëpo, partia e parë e dalë nga zgjedhjet e gjashtë tetorit nuk e ka dorëzuar ende emrin për mandatar te i pari i vendit, Hashim Thaçi.

Vetëvendosja për këtë është duke u kritikuar edhe nga partia me të cilën tash e sa muaj është duke negociuar për koalicion. Mosdorëzimi i emrit për mandatarin nga LDK-ja po shihet si frikë për të marrë përgjegjësi.

“Mandati është te partia e parë. Edhe këtë rast nuk janë tu e marrë mandatarin tash e 3 javë. Tregon një farë frike ose tregon se sa e vështirë është me i ndërtu institucionet. Si duket nuk ka vullnet. Është obligim kushtetues i tyre, na po presim. E kam thënë edhe ma herët që ka një lloj frike me e marrë këtë post, edhe këtë zyrë me e udhëheq vendin, tani po vërtetohen edhe ma shumë. Ambasadori Walker tha me siguri ka aluduar për LV-në, që ka frikë prej politikanëve me i marrë detyrat shtetndërtuese”, ka thënë në emisionin DPT te Fidani, sekretari i Lidhjes Demokratike, Arban Abrashi.

Përveç kësaj, shtyrja e propozimit nga LV-ja, që do të hapte rrugë pastaj për krijim të institucioneve, ka bërë që Presidenca të lajmërojë se për këtë do të drejtohen për interpretim në Gjykatë Kushtetuese. Kjo pasi që ata kanë kërkuar të dihet se sa ka kohë partia e parë e dalë nga zgjedhjet për të dorëzuar emrin.

Për këto deklarata e se kur do të bëjnë propozimin për mandatar, kanë folur sot gjatë ditës nga Lëvizja Vetëvendosje në një deklaratë për Gazetën Express.

Nga zyra për media, Arlind Manxhuka, ka thënë se synim i LV-së mbetet edhe më tutje krijimi i institucioneve të reja, tash kur veçse është bërë zgjedhja e kryesisë.

Ai ka shtuar se brenda afateve do të bëjnë edhe dorëzimin e emrit për mandatar, por pa saktësuar se kur do të ndodhë një gjë e tillë.

“Synimi i Lëvizjes Vetëvendosje ka qenë dhe mbetet krijimi i institucioneve të reja në përputhje me vullnetin qytetar të shprehur më 6 tetor 2019, përkatësisht themelimi i qeverisë, tash kur Kuvendi i Kosovës është konstituuar dhe me ç’rast ka zgjedhur kryesinë e re në krye të këtij institucioni Glauk Konjufcën. Në këtë drejtim ne po bëjmë të gjitha përpjekjet që sa më parë të kemi qeverinë e re, ndërkaq siç është theksuar në mbledhjen e fundit të Kryesisë së Lëvizjes përbrenda afateve dhe pa ndonjë vonesë Lëvizja Vetëvendosje sigurisht se do të dërgojë emrin e mandatarit ashtu siç parashihet me Kushtetutën e vendit dhe me këtë rast ne do ta njoftojmë opinionin publik me kohë kur do ta dorëzojmë emrin e mandatarit”, është shprehur Manxhuka.

Dorëzimin e emrit për mandatar e ka kërkuar ditë më parë edhe presidenti i shtetit, Hashim Thaçi, mirëpo kësaj thirrjeje të tij i është përgjigjur duke i kërkuar që të mos bëjë presion, i pari i LV-së, Albin Kurti.

LV-ja dhe LDK-ja ende nuk kanë arritur të dakordohen për koalicion, ndërsa, tani vetëm se janë shtuar edhe më shumë përplasjet mes tyre. Kjo pasi që as njëra e as tjetra nuk po lëshojnë pe nga kushtet që kanë vënë në tavolinë të diskutimit. /GazetaExpress/