Velipojë, i riu kapet me kanabis dhe kundërshton forcat e policisë

Shqiperi

Gazeta Express

30/08/2025 12:26

Policia e Shkodrës ka nisur një procedim penal në gjendje të lirë ndaj shtetasit S. P., 28 vjeç, banues në fshatin Shtoj i Vjetër, i dyshuar për kundërshtim të punonjësve të rendit dhe posedim të lëndëve narkotike.

Sipas njoftimit zyrtar të Drejtorisë Vendore të Policisë Shkodër, ngjarja ka ndodhur në Velipojë, ku ka pasur një konflikt mes disa personave. Gjatë ndërhyrjes së policisë për të shoqëruar personat e përfshirë, shtetasi S. P. ka kundërshtuar efektivët në kryerjen e detyrës.

Gjatë kontrollit fizik të ushtruar ndaj tij, shërbimet e policisë kanë gjetur dhe sekuestruar një sasi të vogël lënde të dyshuar cannabis sativa, e cila është marrë si provë materiale në kuadër të hetimit.

Materialet procedurale janë referuar pranë Prokurorisë së Gjykatës së Shkallës së Parë të Juridiksionit të Përgjithshëm Shkodër, e cila do të vijojë me veprimet e mëtejshme ligjore ndaj të dyshuarit.