Trump: Reagimi i Iranit ndaj bllokadës amerikane ka qenë “i jashtëzakonshëm”

Lajme

Gazeta Express

15/04/2026 12:34

Presidenti i SHBA-së, Donald Trump, ka deklaruar se bllokada amerikane ndaj porteve iraniane po funksionon dhe se reagimi i Iranit ndaj saj ka qenë “mjaft i jashtëzakonshëm”.

Në një intervistë për programin “Mornings with Maria” në Fox Business, Trump tha se kjo ishte një zhvillim që ai e kishte parashikuar më herët dhe se situata po ecën sipas pritjeve të tij. Ai shtoi se veprimet e fundit të SHBA-së kanë pasur një ndikim të madh dhe se reagimi i Iranit duket më i fortë sesa pritej fillimisht.

Trump u shpreh se, në fund të fundit, ajo që ka rëndësi është rezultati final i kësaj politike dhe efektet që do të ketë në terren.

I pyetur nëse ka pasur kundërshtime nga vende të tjera si Kina apo Arabia Saudite lidhur me bllokadën, ai tha se nuk ka marrë asnjë reagim negativ nga këto shtete.

Deklaratat e tij vijnë në një kohë tensionesh të vazhdueshme mes SHBA-së dhe Iranit, ku zhvillimet diplomatike dhe ushtarake po mbeten në fokus të madh ndërkombëtar, raporton CNN.