Shqipëri: Një 60-vjeçar gjendet i vdekur në lum

Lajme

Gazeta Express

07/05/2026 8:25

Një 60-vjeçar nga fshati Kurilë i Devollit është gjetur i pajetë mëngjesin e sotëm në një lum.

Sipas informacioneve paraprake, viktima kishte shkuar për vizitë tek disa të afërm në fshatin Vishocicë, ku kishte qëndruar deri vonë në një lokal të zonës.

Burime nga grupi hetimor bëjnë me dije se, në momentin kur po kthehej, 60-vjeçari dyshohet se ka kaluar mbi një urë dhe është rrëzuar aksidentalisht në lum.

Sipas dëshmive të personave që kanë qenë me të në lokal, ai ndodhej në gjendje të dehur, shkruan abcnews.

Nga këqyrja paraprake e vendngjarjes, policia dyshon se bëhet fjalë për një ngjarje aksidentale, ndërsa pritet ekspertiza mjeko-ligjore për të përcaktuar shkakun e saktë të vdekjes.

Policia vijon hetimet për zbardhjen e plotë të rrethanave të rastit.