SHBA ndryshon rregullat për Green Card: Aplikimet do të bëhen nga jashtë vendit

Lajme

Gazeta Express

23/05/2026 18:16

Të huajt që kërkojnë të ndryshojnë statusin e tyre të emigracionit në Shtetet e Bashkuara për të siguruar “green card” do të duhet ta bëjnë këtë nga jashtë vendit përmes Departamentit të Shtetit, njoftoi të premten Shërbimi i Shtetësisë dhe Emigracionit i SHBA-së (USCIS), në një veprim që u kritikua nga grupet humanitare.

USCIS e shpalli këtë ndryshim në një memorandum politikash, ku u udhëzonte zyrtarëve të shqyrtonin faktorët dhe informacionet përkatëse rast pas rasti kur të përcaktonin nëse justifikohej dhënia e një lehtësimi të jashtëzakonshëm, raporton Reuters, përcjell Express.

“Një i huaj që ndodhet përkohësisht në SHBA dhe dëshiron një Green Card duhet të kthehet në vendin e tij të origjinës për të aplikuar,” tha Departamenti Amerikan i Sigurisë Kombëtare, i cili mbikëqyr USCIS-in.

“Kjo politikë i lejon sistemit tonë të emigracionit të funksionojë ashtu siç e parashikon ligji, në vend që të inkurajojë shfrytëzimin e boshllëqeve ligjore.”

USCIS tha se politika e re do të lirojë burime të agjencisë për t’u përqendruar në përpunimin e rasteve të tjera.

HIAS, një organizatë ndihmëse që ofron shërbime për refugjatët dhe grupe të tjera emigrantësh, tha se USCIS po i detyron të mbijetuarit e trafikimit, si edhe fëmijët e abuzuar dhe të neglizhuar, të kthehen në vendet e rrezikshme nga të cilat janë larguar, në mënyrë që të përpunojnë aplikimet e tyre për green card, të cilat u japin atyre qëndrim të përhershëm në SHBA.

Ndryshimi i politikës të premten është hapi më i fundit në një seri masash të ndërmarra nga presidenti amerikan Donald Trump gjatë vitit të fundit për të forcuar kontrollin mbi migrimin drejt Shteteve të Bashkuara.

Vitin e kaluar, administrata Trump ndërmori hapa për të shkurtuar kohëzgjatjen e vizave për studentët, vizitorët e shkëmbimeve kulturore dhe përfaqësuesit e medias.

Në janar, Departamenti i Shtetit njoftoi se kishte revokuar më shumë se 100,000 viza që nga marrja e detyrës nga Trump një vit më parë.